बाँके भदौ १५ गते ।
बाँकेको दुर्गम मानिने तथा स्वास्थ्य सेवाको पहुँचसमेत न्यून भएको नरैनापुर गाउँपालिकामा सञ्चालनमा आएको अल्ट्रासाउन्ड सेवाले गर्भवतीहरूलाई सहज भएको छ ।
गाउँमै अल्ट्रासाउन्ड सेवा सुरु भएपछि नरैनापुरका गर्भवतीहरूले अल्ट्रासाउन्ड गराउनुपरेमा ४५ किलोमिटर टाढा नेपालगन्ज पुगेर महँगो शुल्क तिरेर सो सेवा लिनुपर्ने बाध्यता समेत अन्त्य भएको गाउँपालिकाले जनाएको छ ।
गाउँपालिकाको स्वास्थ्य शाखा प्रमुख नगेन्द्रकुमार शाहका अनुसार अल्ट्रासाउन्डमार्फत गर्भमा रहेको शिशुको अवस्था समयमै थाहा हुने भएकाले जोखिमपूर्ण अवस्थामा मातृ–शिशु दुबैको ज्यान जोगाउन सकिने सम्भावना बढेको छ ।
सो सेवा गाउँघरकै स्वास्थ्य केन्द्रमा सुरु गरिएपछि टाढा गएर गर्भ जाँच गराउनुपर्ने झन्झट हटेसँगै मातृ तथा शिशु मृत्युदर घटाउने प्रयासमा पनि सहयोग पुगेको स्वास्थ्य शाखा प्रमुख शाहले बताए । उनका अनुसार अहिले सो अल्ट्रासाउन्ड सेवा नरैनापुर–४ मा सञ्चालन भइरहेको छ ।
स्वास्थ्य केन्द्रका सिनियर अनमी लक्ष्मी गुरुङका अनुसार अल्ट्रासाउन्डले गर्भको अवस्था, बच्चाको तौल, उमेर, प्लासेन्टको स्थिति, ‘एम्नियोटिक’ तरलको मात्रा र मुटुको धड्कनबारे जानकारी दिन्छ । जसले गर्दा गर्भको बारेमा सबै कुरा जानकारी हुने गरेको छ ।
गत आर्थिक वर्षको असार मसान्तसम्म एक हजार ३८६ जना गर्भवतीले अल्ट्रासाउन्ड सेवा लिइसकेको स्वास्थ्य शाखाले जनाएको छ । सेवा प्रभावकारी देखिएकाले गाउँपालिकाले सबै ६ वटै वडामा सो सेवा विस्तार गर्ने लक्ष्य राखेको गाउँपालिका अध्यक्ष शैयद इस्तियाक अहमद शाहले बताए। हाल एक मात्रै मेसिनमार्फत सेवा दिइँदै आएको छ ।
गाउँपालिका अध्यक्ष शाहले गाउँमै भिडियो एक्सरेमार्फत गर्भ परीक्षण सेवा पाएपछि स्थानीय महिलाहरू उत्साहित भएको बताए । उनले स्वास्थ्यलाई प्राथमिकतामा राखेर बजेट विनियोजन गरिएकाले आगामी दिनमा स्वास्थ्यका थप सेवा सुविधा पनि बिस्तार गरिने जानकारी दिए।
Discussion about this post