बाँके असोज २२ गते ।
दुर्गा मुर्ती विसर्जनको क्रममा उत्पन्न विवाद बाँके प्रहरीको सक्रियतामा समाधान भएको छ ।
यहि असोज १७ गते दुर्गा मुर्ती विसर्जन गर्न जाने क्रममा र्यालीमाथि फोहोर फालेको विषयमा विवाद हुँदा भएको विवाद दुई पक्ष विच सहमति भएपछि विवाद समाधान भएको बाँके प्रहरी प्रमुख एसपी अंगुर जिसीले जानकारी दिए ।
उनले फोहोर फाल्ने ब्यक्तिको पहिचान गरि असोज २१ गते नियन्त्रणमा लिएको बताउँदै कानुनी कारवाही गर्ने क्रममा फोहोर फाल्ने ब्यक्तिले क्षमायाचना गरेपछि पीडित पक्षले भूलबस गल्ती भएको भन्दै कानुनी कारवाही नगर्न भनेपछि समस्या समाधान भएको बताए ।
‘बाँके प्रहरीले फोहोर फाल्नेलाई नियन्त्रणमा लिएर कानुन बमोजिम कार्यवाही गर्न प्रक्रिया अगाडी बढाएको थियो, तर पीडित पक्षले नै कानुनी कारवाही नगर्न भनेपछि उत्पन्न विवाद समाधान भएको छ,’ एसपी जिसीले भने । फोहोर फाल्ने ब्यक्तिले भुलबस भएको स्वीकार गर्दै क्षमायाचना गरेको बताउँदै उनले आगामी दिनमा यस्ता कार्य नगर्ने प्रतिवद्धता जनाएको बताए ।
फोहोर फाल्ने महिलाको साथमा साना–साना नाबालक र एउटा ६ महिनाको बच्चा समेत भएकोले मानविय संवेदनशिलता समेतलाई ध्यानमा राख्दै विपक्षीलाई माफी दिइएको पीडित पक्षलाई हवाला दिँदै बाँके प्रहरी प्रवक्ता डिएसपी दीपक पातलीले जानकारी दिए ।
‘मानविय संवेदनशीलतालाई मध्यनजर गरि कानुनी कारवाही प्रक्रिया अगाडि नबढाउने भनी पीडित पक्षले सहमति गरी एक आपसमा मिलापत्र गरीएको छ,’ उनले भने, ‘एक आपसमा सामाजिक सद्भाव कायम राख्दै कुनै पनि भ्रमात्मक समाचार एवं सूचनाको विश्वासमा परी अवाञ्छित तथा हिंसात्मक गतिविधीमा संलग्न नभई शान्ति सुव्यवस्था बनाई राख्न आ–आफ्नो तर्फबाट भूमिका खेल्ने सहमति समेत भएको छ ।’
उक्त विवादले उग्ररुप लिएपछि घटनास्थल तनावग्रस्त बनेको थियो । जिल्ला प्रहरी कार्यालयल, वडा प्रहरी कार्यालय लगायत सशस्त्र प्रहरीको टोलीले विवादलाई सामान्य बनाउन भूमिका खेलेका थिए ।
Discussion about this post