बाँके असोज ३१ गते ।
तिहार र छठ पर्व नजिकिँदै गर्दा बाँकेका किसानहरु अहिले धान भित्र्याउने काममा व्यस्त भएका छन् । खेतभरि सुनौलो पाकेको धान काट्ने, बोक्ने र मस्र्याउने क्रम चलिरहेका कारण गाउँ गाउँमा चहलपहल बढेको छ ।
विगत केही हप्ता अघिदेखिको मनसुन अन्त्यसँगै मौसम अनुकूल बनेपछि किसानहरुले कटनी कार्यलाई तीव्रता दिएका हुन् । समयमै धान भित्र्याउन नपाए वर्षभरको मेहनत खेर जाने डरले किसानलाई बिहानैदेखि साँझसम्म खेतमै खटिएको देखिन्छ । राप्तीसोनारी–५ बिनौनाका सुनौली थारुका अनुसार, “हामी बिहान सबेरै उठेर खेत जान्छौं, बेलुकी अँध्यारो नपर्दासम्म काम गर्छौं । अहिले सबैलाई धान भित्र्याउने हतारो छ।”
धान भित्र्याउने चटारोका बीच कतिपय ठाउँमा मजुर अभाव पनि समस्या बनेको छ । मजुरको अभावका कारण मेसिनबाट धान काट्ने किसानहरूको संख्या बढ्दै गएको स्थानीयले बताएका छन् । किसानहरु अहिलेको व्यस्ततालाई खुसीको हतारोू भन्दै परिश्रमको फल काट्न पाउँदा सन्तुष्टि व्यक्त गर्छन् ।
चाडपर्व नजिकिँदै गर्दा धान भित्र्याएर दानापानी जुटाउने आशाले बाँकेका गाउँघरमा मुस्कान फस्टाएको देखिन्छ । बाँकेमा साढे ३६ हजार हेक्टर जमिनमा धान खेती गरिएको छ ।
Discussion about this post