बाँके असोज ३१ गते ।
भाद्र २३ र २४ गते भएको जेन–जी आन्दोलनका क्रममा बाँके जिल्लाका विभिन्न सरकारी कार्यालयमा आगजनी, तोडफोड र लुटपाटका कारण ठूलो क्षति पुगेको पृष्ठभूमिमा जिल्ला भित्रका निजामती कर्मचारी संगठनहरूले तिनै घटनापछिका धम्की र आरोपप्रति घोर आपत्ति जनाएका छन्।
बाँके जिल्लास्थित चारवटा राष्ट्रियस्तरका ट्रेड युनियनहरूले आज संयुक्त विज्ञप्ति जारी गर्दै सरकारी सेवामा खटिएका राष्ट्रसेवक कर्मचारीहरूलाई धम्क्याउने, थर्काउने, अपमान गर्ने र विभिन्न आधारहीन लान्छना लगाउने गतिविधिप्रति गम्भीर आपत्ति प्रकट गरेका हुन्।
विज्ञप्तिमा भनिएको छ, “सरकारी कार्यालयहरू खरानी र धुलो टकटक्याउँदै जोखिमयुक्त भवनमा सेवा सञ्चालन गरिरहेका बेला कर्मचारीहरूलाई धम्क्याउने, हतोत्साहित गर्ने र मनोबल घटाउने कार्य अत्यन्त निन्दनीय छ।”
विज्ञप्तिमा बाँकेका प्रमुख जिल्ला अधिकारी धर्मराज जोशीलाई विभिन्न समूहका नाममा धम्क्याइएको र बिना प्रमाण लान्छना लगाइएको विषयप्रति पनि गम्भीर ध्यानाकर्षण गराइएको छ। संगठनहरूले यस्ता क्रियाकलापले सरकारी सेवाको मनोबल कमजोर बनाउने भन्दै तत्काल यस्तो कार्य रोक्न माग गरेका छन्।
चारवटै संगठनहरूले संयुक्तरूपमा जारी गरेको विज्ञप्तिमा भनिएको छ, “यदि कुनै कर्मचारीले काममा त्रुटि वा गल्ती गरेको भए कानुनी बाटोबाट समाधान खोज्नुपर्छ, तर बिना प्रमाण अपमानित गर्ने र मनोबल घटाउने काम रोक्नुपर्छ।” कर्मचारी संगठनहरूले सरकारसँग निजामती कर्मचारीको सुरक्षा, न्याय र कानूनी प्रत्याभूति सुनिश्चित गर्न जोडदार माग पनि गरेका छन्।
विज्ञप्तिमा हस्ताक्षर गर्नेहरूमा नेपाल निजामती कर्मचारी संगठन बाँकेका अध्यक्ष देवीलाल चौलागाई, नेपाल राष्ट्रिय निजामती कर्मचारी संगठन बाँकेका उपाध्यक्ष दिलिम नेपाली, नेपाल निजामती कर्मचारी युनियन बाँकेका अध्यक्ष नगेन्द्र बहादुर शाही र उरकार एकीकृत सरकारी कर्मचारी जिल्ला कार्य समिति बाँकेका अध्यक्ष धनमल महत रहेका छन्।
Discussion about this post