बाँके कात्तिक २५ गते ।
धान उत्पादनमा यस वर्ष उल्लेखनीय वृद्धि भए पनि बाँकेका किसानलाई बिक्रीको चिन्ताले पिरोलेको छ । खाद्य व्यवस्था तथा व्यापार कम्पनी लिमिटेडले धान खरिदका लागि सीमित कोटा तोकेपछि किसानले उत्पादन बिक्री नहुने डरले पिरोलिएका हुन् ।
यस वर्ष बाँकेमा करिब १ लाख ५६ हजार २ सय मेट्रिक टन धान उत्पादन हुने अनुमान गरिएको छ । तर, कम्पनीले २० हजार क्विन्टल मात्र खरिद गर्ने निर्णय गरेपछि किसानहरूमा निराशा छाएको छ ।
नरैनापुरका किसान त्रिभुवन यादव भन्छन्, “उत्पादन बढेको छ, तर बजार छैन । बाहिर व्यापारीले सरकारी मूल्यमा धान किन्दैनन्, घरमा राख्ने ठाउँ पनि छैन, के गर्ने भनेर चिन्तित छु ।” उनी भन्छन् । गत वर्षको तुलनामा यसपटक धान उत्पादन राम्रो भए पनि कम्पनीले भण्डारण समस्याका कारण सीमित मात्रामा खरिद गर्न थालेपछि किसान मर्कामा परेका छन् ।
राप्तीसोनारी–७ का किसान कालुराम थारु पनि निराश छन् । उनी भन्छन्—“धान बेच्न खाद्य कम्पनी गएँ, तर कोटा सकिएको भन्दै फर्काइयो ।”
खाद्य व्यवस्था तथा व्यापार कम्पनी लिमिटेड बाँकेका प्रमुख रामशरण लामिछानेले आइतबारबाट मात्र किसानबाट धान खरिद शुरु भएको जानकारी दिए । उनका अनुसार यस वर्ष मोटा धान १५ हजार क्विन्टल र मध्यम धान ५ हजार क्विन्टल खरिद गर्ने कोटा निर्धारण गरिएको छ । लामिछानेले भने—“हाम्रो भण्डारण क्षमता सीमित छ । गत वर्षकै करिब २० हजार क्विन्टल चामल अझै गोदाममा बाँकी छ, त्यसको व्यवस्थापनपछि मात्रै थप खरिद गर्न सकिन्छ ।”
Discussion about this post