बाँके मंसिर १ गते ।
हिंजोआज रातको समयमा नेपालगन्जका सडकमा फरक सुनिन थालिएको छ – मोटरसाइकलदेखि अन्य सवारीसाधन अचानक रोकिने आवाज, ट्राफिकको सिट्टी, टर्चको उज्यालो र ‘कागजात देखाउनुस्’ भन्ने आवाज। सामान्य नागरिकलाई झस्काउने यी दृश्यहरू अहिले ट्राफिक प्रहरीका लागि दैनिक लय बनेका छन्।
दिउँसोभन्दा रातमा दुर्घटना झनै बढ्न थालेपछि बाँके ट्राफिक प्रहरीले रात्री चेकजाँचलाई ‘महाअभियान’का रुपमा अघि बढाएको छ। नेपालगञ्ज ट्राफिक प्रहरी पोष्टका इन्चार्ज, प्रहरी वरिष्ठ नायब निरीक्षक नन्दकुमार पोखरेलको दिन त बिहानै सुरु हुन्छ, तर उनको प्रमुख चिन्ता सूर्य अस्ताएपछि देखिने सड़कको अनुहार हो।
चिसो मौसम, कुहिरो, कमजोर प्रकाश, त्यसैमा मापसेको सेवन– यी सबैले रातको बाटोलाई जोखिमयुक्त बनाइदिन्छन्। पोखरेल भन्छन्,
“राति धेरैले मापसे गरेर सवारी साधन चलाउँदा दुर्घटना भएका छन् । घर पुग्ने हतार, विपरित दिशाबाट आएको गाडीको तेज लाइट, बाटोमा रोकिएका सवारी, पशुचौपाया‘ यी सबैले दुर्घटनाको जोखिम बढाइदिन्छ।” सबैभन्दा ठूलो चुनौती भनेको मापसे हो। काम सकेर घर फर्कने नाममा मादक पदार्थ सेवन गरेर सवारी चलाउनेको संख्या रातमा उल्लेख्य देखिन्छ।
यही कारण ट्राफिक प्रहरीले राति ८ बजेदेखि १२ बजेसम्म नियमित चेकजाँचलाई कडाइका साथ सञ्चालन गर्दै आएको छ। प्रहरी नायब निरीक्षक पोखरेल आफ्नै टोलीलाई देखाउँदै भन्छन्,
“रातमा ट्राफिक प्रहरीलाई पनि आराम गर्ने मन लाग्छ। तर हामी तपाईंकै सुरक्षाका लागि हाम्रो चाहना मारेर सडकमा उभिन्छौँ। यो हाम्रो रहर होइन, कर्तव्य हो।” सडक छेउ उभिएका प्रहरीले न्यानो ज्याकेट र टोपी लगाएका छन्, तर चिसो हावा र थकानसँग उनीहरूको मुखामुख कति कठिन छ भन्ने बाहिरबाट बुझिँदैन। रातको १० बजेतिर पनि उनीहरूका हातमा टर्च उस्तै जोशले बलिरहेको हुन्छ—कसैको दोष देखाउन होइन, दुर्घटना रोक्न।
नियम पालन गर्ने नागरिकलाई यो अभियान सुरक्षाको ग्यारेन्टी जस्तै लाग्छ। तर नियम तोड्न चलिपरिएकाहरूले भने कहिलेकाहीँ चेकजाँचलाई ‘अनावश्यक झन्झट’ ठान्ने गरेको पोखरेलको अनुभव छ। उनले भन्छन्,
“सकारात्मक सोच राख्नुस्, हामी तपाईंको सुरक्षाका लागि खटिएका हौँ।”
जिल्ला प्रहरी कार्यालय बाँकेका प्रहरी प्रमुख उपरीक्षक अंगुर जिसी र जिल्ला ट्राफिक प्रहरी कार्यालयका ट्राफिक प्रमुख प्रहरी निरीक्षक कनक शाही दुबैको कडा निर्देशनमा यो अभियान सञ्चालन भइरहेको छ। नेतृत्वको स्पष्ट निर्देशन, मैदानमा प्रहरीको समर्पण र समुदायको सहयोग—यी तीनको संयोजन नै दुर्घटना न्यूनीकरणको प्रभावकारी सूत्र मानिन्छ।
राती घर फर्कने हतार, केही मिनेट बचाउने चाहनाले पुरै जीवन बदलिदिन सक्छ। त्यसैले पोखरेलको सन्देश छ–“जरुरी भएपनि ट्राफिक नियम पालना गर्नुस्। विहान हुस्सु लाग्ने गरेकाले पनि दुर्घटना बढेकाले सचेत रहनुहोस् । मापसे गरेर सवारीसाधन नचलाउनुहोस् । तीब्र गतिमा सवारी साधन नचलाउनुहोस्। दुर्घटना रोक्ने जिम्मेवारी सबैको हो ।”
Discussion about this post