बाँके मंसिर १७ गते ।
जनता समाजवादी पार्टी नेपाल (जसपा नेपाल) बाँकेले आज नेपालगन्जमा प्रदर्शन गरेको छ । जनसंख्याको आधारमा संघीय संसदिय र प्रादेशिक निर्वाचन क्षेत्र पुनःनिर्धारण गर्न र पूर्ण समानुपातिक निर्वाचन प्रणाली लागू गर्न माग गरि जसपा नेपाल बाँकेले नेपालगन्जमा प्रदर्शन गरेको हो ।
नेपालगन्जको बिपी चोकबाट सुरु भएको प्रदर्शन त्रिभुवन चोक हुँदै जिल्ला प्रशासन कार्यालय अगाडी पुगेर कोणसभामा परिणत भएको थियो । प्रदर्शनको क्रममा जेन जी (युवा पुस्ता) ले आन्दोलनका बेला उठाएका जायज मुद्धा पुरा गर्नुपर्ने, आन्दोलनको बेला गठन भएका न्यायीक समितिको छानबिन प्रतिवेदन सार्वजनिक गर्नुपर्ने, किसानलाई सहुलियत दरमा ऋण, मलखाद, बिउ बिजन उपलब्ध गराउनु पर्ने माग गरिएको थियो ।
सो अवसरमा प्रत्यक्ष निर्वाचित कार्यकारणी राष्ट्रपतिय व्यवस्था लागु गर्न, दलित, महिला, विकट क्षेत्रको मायोचित प्रतिनिधित्व गराउन संघीय संसदीय/प्रादेशिक निर्वाचन क्षेत्रको व्यवस्था गर्न समेत माग गरिएको जसपा नेपालका केन्द्रिय सचिव कमरुद्धिन राईले बताए ।
विरोध कार्यक्रममा बोल्दै सचिव राईले राज्यले उचित कानुन तथा ऐन नबनाउँदा पछाडी परेका समुदायको अधिकार स्थापित हुन नसकेको बताए ।
उनले आन्दोलनका बेला जेन जी ले उठाएका जायज माग सम्बोधन नभएको भन्दै तत्काल पूरा गर्न सरकारसँग माग गरे । ‘नेपाललाई कृषि प्रधान देश भनिन्छ, तर यो कागज र बोलीमा मात्र सिमित छ । कृषकहरु समयमा मल र विउ विजन नपाउँदा कृषिबाट विस्थापित हुनुपर्ने अवस्था छ,’ उनले भने, ‘समयमा रासायनिक मल र विउ विजन उपलब्ध नगराए जसपा नेपाल सशक्त आन्दोलनमा उत्रिन बाध्य हुने छ ।’
जसपा नेपाल बाँके अध्यक्ष कौशलकुमार धोबीको अध्यक्षतामा भएको विरोध सभामा केन्द्रिय सदस्य इस्तियाक अहमद शाहले वर्तमान निर्वाचन क्षेत्रले पछाडी परेका समुदायलाई समेट्न नसकेको भन्दै तत्काल पुनर्विचार गर्न माग गरे । उनले पछाडी परेका जातजाति र समुदाय तथा विकट क्षेत्रको प्रतिनिधित्व हुने गरि विशेष निर्वाचन क्षेत्र निर्धारण हुनुपर्ने विचार राखेका थिए ।
उक्त विरोध सभामा केन्द्रिय सदस्य बेबि तबस्सुम अन्सारी, नेता इसरत मुकेरी, राजन राना मगर, लुम्बिनी प्रदेश उपाध्यक्ष बाबू खाँ, बाँके जिल्ला उपाध्यक्ष अकबर खाँ लगायतले सम्बोधन गरेका थिए ।
Discussion about this post