बाँके मंसिर १८ गते ।
बाँके राष्ट्रिय निकुञ्जमा आन्तरिक तथा बाह्य पर्यटकहरूको सङ्ख्या पछिल्ला वर्षहरूमा उल्लेखनीयरूपमा बढ्दै गएको छ । वन्यजन्तुहरूको बासस्थान संरक्षण र व्यवस्थापनमा गरिएको निरन्तर प्रयासका कारण निकुञ्जभित्र वन्यजन्तुको सङ्ख्या उल्लेख्य रूपमा वृद्धि भएपछि यहाँको पर्यटन गतिविधिसमेत तीव्र बनेको हो ।
निकुञ्जले बाघ, जङ्गली हात्ती, मृग, जरायो लगायतका दुर्लभ वन्यजन्तुका बासस्थानलाई सुरक्षित र व्यवस्थित बनाउँदै लगेकाले स्वदेशी तथा विदेशी पर्यटकको आकर्षण झन् बढेको बाँके राष्ट्रिय निकुञ्जका प्रमुख वीरेन्द्र प्रसाद कँडेल बताउँछन् । उनका अनुसार १६ वटा पानीपोखरी, व्यवस्थित घासे मैदान, प्राकृतिक ताल–तलैया, वन्यजन्तु अवलोकनका लागि तयार गरिएका मचान तथा जीप सफारीका सहज प्रबन्धहरूले निकुञ्ज भ्रमणलाई आकर्षक र अनुभव सम्पन्न बनाएको छ ।
जैविक विविधताले भरिपूर्ण तथा भौगोलिक हिसाबले वन्यजन्तुका लागि अत्यन्त उपयुक्त मानिने बाँके राष्ट्रिय निकुञ्ज पछिल्लो समय बाघ अवलोकनको प्रमुख गन्तव्यका रूपमा उभिएको छ । खासगरी भारतीय तथा तेस्रो मुलुकका पर्यटकहरू बाघ अवलोकनका लागि बाँके आउने गरेका छन् । “बाघ हेर्न चाहने पर्यटकका लागि बाँके राष्ट्रिय निकुञ्ज महत्वपूर्ण हबका रूपमा स्थापित हुँदै गएको छ । यसको प्रभावकारी प्रचार–प्रसारमा सञ्चार माध्यमले पनि विशेष भूमिका खेल्नुपर्ने देखिन्छ,” नेपाल पर्यटन बोर्डका वरिष्ठ प्रबन्धक सूर्य थपलिया बताउँछन् ।
नेपालको पश्चिम भागमा अवस्थित बाँके राष्ट्रिय निकुञ्जमा पर्यटनको सम्भावना प्रचुर रहेको विशेषज्ञहरू बताउँछन् । प्राकृतिक सम्पदा, वन्यजन्तुको विविधता, शान्त वातावरण, जङ्गल सफारीको रोमाञ्च र आधुनिक पर्यटक संरचनाले गर्दा यहाँ आउनेहरूको सङ्ख्या दिन प्रतिदिन बढ्दै गएको छ । निकुञ्जभित्र बनाइएका पोखरी, व्यवस्थित घासे मैदान र अवलोकन मचानहरूले पर्यटकलाई वन्यजन्तु चिन्न र बुझ्न सहज बनाएको छ ।
विशेषगरी हाल जीप सफारी प्रति पर्यटकको आकर्षण तीव्ररूपमा बढेको छ । घना जङ्गलभित्र छिर्ने र बाघ, मृग, हात्ती, चराचुरुङ्गीले देख्न पाउने अनुभव पर्यटकका लागि निकै नयाँ र रोमाञ्चक मानिन्छ । यसका कारण आन्तरिक पर्यटक मात्र होइन, दक्षिण एसियाका विभिन्न देशबाट पनि बाँके आउने क्रम तीव्र हुँदै गएको छ ।
स्थानीय आर्थिक गतिविधिमा पनि बाँके राष्ट्रिय निकुञ्जले सकारात्मक प्रभाव पारेको छ । होटल, होमस्टे, गाइड, जीप–सफारी व्यवसाय, हस्तकला तथा स्थानीय उत्पादनहरूका माध्यमबाट थुप्रै रोजगारी सिर्जना भएको छ । निकुञ्जलाई विश्वस्तरीय पर्यटन गन्तव्यका रूपमा स्थापित गर्न आवश्यक थप संरचना निर्माण र प्रचार–प्रसारको आवश्यकता रहेको पर्यटन व्यवसायीहरू बताउँछन् ।
समृद्ध जीवविविधता, सुरक्षित बासस्थान, व्यवस्थित पर्यटक सुविधा र बाघ अवलोकनको दुर्लभ अवसरले बाँके राष्ट्रिय निकुञ्ज अहिले पर्यटकहरूको पहिलो रोजाइ बन्दै गएको छ । संरक्षण र पर्यटनप्रति स्थानीय तथा सरकारी निकायको ध्यान अझै प्रभावकारी बनेमा बाँके राष्ट्रिय निकुञ्ज पश्चिम नेपालको प्रमुख पर्यटन केन्द्रका रूपमा स्थापित हुने निश्चित् देखिन्छ ।
Discussion about this post