बाँके मंसिर २३ गते ।
भारतबाट अवैधरुपमा साना हातहतियार तथा विस्फोटक पदार्थ भित्रिन सक्ने खतरालाई मध्यनजर गरि बाँके प्रहरीले जमुनाह नाकामा कडाई गरेको छ । भारतबाट अवैध रुपमा साना हातहतियार तथा लागु औषध भित्रिने खतरालाई मध्यनजर गरि भारतबाट नेपाल आउनेमाथि कडाई गरिएको बाँके प्रहरी प्रमुख एसपी अंगुर जिसीले बताए ।
इलाका प्रहरी कार्यालय जमुनाहाका इन्चार्ज प्रहरी निरीक्षक किरणप्रकाश मल्लको नेतृत्वमा खटिएका प्रहरी कर्मचारीले नाकामा कडाई गरेको उनले बताए । ‘भारतबाट अवैध हातहतियार तथा लागु औषध भित्रिन सक्ने खतरालाई मध्यनजर गरि नाकामा कडाई गरिएको हो,’ एसपी जिसीले भने ।
खुला सीमा र कमजोर सुरक्षा ब्यवस्थाको फाइदा उठाउँदै साना हातहतियार र लागु पदार्थको समेत आयात हुन सक्ने जोखिमलाई मध्यनजर गरेर सीमामा कडाइ गरिएको उनको भनाई छ ।
नाकालाई नाकामा हुने आउजाउलाई ब्यवस्थित बनाउने प्रयास गरिएको उनले बताए । पैदलयात्री, दुई पाङ्ग्रे र तीन पाङ्ग्रे सवारी साधनको फरक फरक लाइन बनाइएको बताउँदै उनले आफू रहदासम्म नाकामा कडाई गरिने स्पष्ट पारे । ‘पहिले के र कस्तो थियो त्यो मेरो चासोको विषय होइन । म बाँकेमा रहँदासम्म नाकामा कडाई हुन्छ,’ उनले भने ।
नाकालाई ब्यवस्थित र पारदर्शी बनाउन नेपालबाट जाने तथा नेपाल आउनेको पहिचान खुल्ने कागजात हेर्न थालेको बताउँदै उनले अवैध ब्यक्ति सहज रुपमा नेपाल आउन नदिइने जिकिर गरे । यसअघि जो कोही सहज रुपमा नाका पार गर्थे, सुरक्षा जाँच पनि नाम मात्रको हुन्थ्यो । तर अहिले प्रवेश गर्ने प्रत्येक मानिसलाई ‘यो नेपाल प्रवेश बिन्दु हो’ भन्ने अनुभूति दिलाउने वातावरण तयार पारिएको छ,’ एसपी जिसीले भने, ‘नाका भनेको नाका जस्तै हुनुपर्छ । कम्तिमा भारतबाट प्रवेश गर्नेले यो आधिकारिक सीमा नाका हो भन्ने महसुस गर्नुपर्छ । यसका लागि प्रहरीले सुरक्षा सतर्कता मात्र बढाएको छैन, नाकाको भौतिक अनुशासन पनि सुधार गरेको छ । लामो समयदेखि भारत–नेपाल सीमालाई अपराधीहरूले सहज ‘ट्रान्जिट’ का रूपमा प्रयोग गर्दै आएको कुरा कुनै नयाँ होइन ।’ अहिले प्रहरीको कडाईले तिनलाई कम्तिमा पनि असहज बनाएकोे उनले दाबी गरे ।
जमुनाह नाका आसपास अव्यवस्थित रूपमा पार्किङ हुँदै आएको अटोरिक्साहरू पनि व्यवस्थापन गरिएको उनले बताए । ‘जहाँ–तहीँ रोक्ने, भीड बढाउने, सुरक्षाकर्मीको आँखा छलेर मान्छे ओसार–पसार गर्ने जस्ता समस्या समाधानको प्रयास भइरहेको उनको भनाई छ । ‘अटोरिक्सा ब्यवस्थापनका लागि सूचना जारी गरिएको छ । सूचनाको म्याद सकिने वित्तिकै अव्यवस्थित रुपमा पार्किङ गर्ने अटोरिक्सालाई कारवाहीको दायरामा ल्याइने छ,’ उनले भने, ‘तोकिएको स्थानमै मात्र गाडी रोक्ने, यात्रु चढाउने, ओराल्ने ब्यवस्था मिलाइएको छ । अँटेर गरे कारवाहीको भागिदार हुनुपर्ने छ ।’
प्रहरीले अटोरिक्सा ब्यवस्थापन गरेपछि जमुनाहा क्षेत्रमा हुँदै आएको भीडभाड कम भएको छ भने यात्रुलाई सहज समेत भएको छ ।
उनले घटनास्थलमा छिटो पुग्ने ब्यवस्था मिलाइएको बताए । यसका लागि ‘क्विक रेस्पोन्स टीम’ परिचालन गरिएको जानकारी दिए । उनले नगरको वीच भागमा क्विक रेस्पोन्स टीम बस्ने ब्यवस्था मिलाइएको बताउँदै जनतालाई सुरक्षाको अनुभूति दिलाउन क्विक रेस्पोन्स टीम परिचालन गरिएको स्पष्ट पारे ।
‘घटना घटेको सूचना पाउने वित्तिकै क्विक रेस्पोन्स टीम पुग्ने ब्यवस्था मिलाइएको छ । कहिले गाडी हुने कहिले नहुने हुन्छ । प्रहरी पनि तयार हुन समय लाग्ने हुन्छ । क्विक रेस्पोन्स टीम २४ सै घण्टा तयारी अवस्थामा रहने भएकोले घटनाको सूचना पाएको केहि समय भित्र पुग्न सक्छ,’ एसपी जिसीले भने ।
उनले निर्वाचनलाई लक्षित गरि सुरक्षाकर्मी परिचालन गरिएको र जिल्लाको सुरक्षा अवस्थाको जानकारी लिने काम जारी रहेको बताए । उनले राप्तीसोनारी, बैजनाथ, खजुरा, कोहलपुर डुडुवा लगायत पालिकामा आफै पुगेर सुरक्षा अवस्था र सुरक्षा चुनौतिका बारेमा जानकारी लिएको बताए । ‘निर्वाचनलाई लक्षित गरि नेपाली सेना र नेपाल प्रहरीको टोलीले विहान–बेलुका संयुक्त गस्ती गरिरहेको छ । यो संयुक्त गस्तीले पनि नागरिकलाई सुरक्षित महशुस गराएको छ,’ एसपी जिसीले भने ।
Discussion about this post