काठमाडौं मंसिर २४ गते ।
समानुपातिक निर्वाचन प्रणालीका लागि एक सय वटा राजनीतिक दलले निर्वाचन आयोगमा आवेदन दिएका छन् । आउँदो फागुन २१ गतेका लागि तय भएको प्रतिनिधिसभा सदस्य चुनावको समानुपातिकतर्फ निवेदन दिने हिजोसम्मको समयसीमा भित्र ती राजनीतिक दलले निवेदन दिएका हुन् । आयोगमा एक सय ४३ दल दर्ता भएका छन् ।
समानुपातिकतर्फ ४३ वटा दलले चासो देखाएनन् । आयोगले यही मङ्सिर २१ देखि २३ गतेसम्म समानुपातिक निर्वाचन प्रयोजनका लागि दल दर्ताको समयसीमा निर्धारण गरेको थियो । आवेदन गर्नेमा संयुक्त चुनाव चिह्न लिएका र एकल चुनाव चिह्न लिएका राजनीतिक दल छन् ।
प्राप्त भएको आवेदनमाथि आवश्यक अध्ययन गरी पर्सिसम्म स्वीकृत गरिने आयोगले जनाएको छ । आयोगले तय गरेको कार्यसूची अनुसार आउँदो पुस १३ र १४ गते समानुपातिकतर्फको बन्द सूची पेश गर्नुपर्नेछ । बन्द सूचीमाथि आवश्यक अध्ययन गरी आउँदो माघ ४ गते प्रारम्भिक सूची प्रकाशित हुनेछ ।
त्यसपछि दाबी विरोध र आवश्यक छानबिन गरी माघ २० गते अन्तिम सूची प्रकाशित हुनेछ । कूल २ सय ७५ सदस्यीय प्रतिनिधिसभामा १ सय ६५ सदस्य प्रत्यक्ष निर्वाचन प्रणालीमार्फत निर्वाचित हुनेछन् । यस्तै, १ सय १० सदस्य भने समानुपातिक निर्वाचन प्रणालीमार्फत निर्वाचित हुनेछन् ।
Discussion about this post