बाँके मंसिर २३ गते ।
जनता समाजवादी पार्टीका महासचिव एवम् पूर्व मन्त्री मोहम्मद इस्तियाक राईले नेपालगन्जको सद्भावलाई विथोल्न केहि तत्व सक्रिय रहेको बताएका छन् । डुडुवा गाउँपालिका ५ कम्दीमा आजबाट सुरु भएको कमरशाह बाबा मेलाको उद्घाटन कार्यक्रममा उनले नेपालगन्जको सामाजिक एवम् धार्मिक सद्भाव नेपालमामात्र नभई विश्वमै ख्याती कमाएको बताए ।
उनले सामाजिक एवम् धार्मिक सद्भावले मात्र उन्नत समाजको निर्माण हुने बताउँदै सवैको सहकार्यले मात्र समग्र बाँके जिल्लाको विकास हुने स्पष्ट पारे । ‘नेपालगन्जमा विद्यमान सामाजिक एवम् धार्मिक सद्भाव विथोल्ने तत्वले आफू पनि नबन्ने र अरुलाई पनि बन्न नदिने खेल खेलिरहेका छन् । यसतर्फ सवै सजग भएर लाग्न जरुरी छ,’ उनले भने ।
उनले आफूले उद्घाटन र शिलान्यास गरेको योजनाहरु क्रमशः निर्माण भइरहेको बताउँदै केहि योजनाहरु पूरा भएर जनताले उपभोग गरिरहेको बताए । उनले जनताको मत तान्न केहि दलका नेता र कार्यकर्ताले आफूलाई गम्भिर आरोप लगाएको गुनासो गरे । ‘निर्वाचनका बेला मलाई चुरण मन्त्री भनेर आरोप लगाउने काम भयो । मैले शिलान्यास गरेका र उद्घाटन गरेका साना–ठूला योजना केहि निर्माण पूरा भइसकेका छन् । केहि निर्माणको क्रममा छन्,’ पूर्व मन्त्री राईले भने, ‘निर्वाचनका बेला मलाई आरोप लगाउनेहरुको मुखमा निर्माण भएका र निर्माण भइरहेका योजनाले बुजो लगाई दिएको छ । मैले धेरै भनिरहनु पर्ने छैन ।’
उनले राप्ती नदिमा निर्माणाधिन पुल आफूले शिलान्यास गरेको बताउँदै यसबाट सिंगो देशबासीलाई फाइदा पुग्ने बताए । उनले आफू कम बोल्ने र धेरै गर्ने ब्यक्ति भएको समेत बताए । ‘मैले यो गरेँ, त्यो गरेँ भनेर भनिरहनु पर्दैन । मैले गरेका विकास निर्माण आफै बोलिरहेका छन् । तपाईहरु सवैले प्रत्यक्ष देखिरहनु भएको छ,’ उनले भने ।
उनले निर्वाचन हुनेमा आशंका ब्यक्त गरे । जेन जी आन्दोलनका बेला प्रहरीको हातहतियार लुटपात भएको र धेरै कैदीहरु जेल बाहिर रहेकोले निर्वाचन हुनेमा आशंका रहेको बताए । ‘निर्वाचनको माहोल बनिसकेको छैन । जनताले असुरक्षित महशुस गरिरहेकोले निर्वाचन हुनेमा आशंका छ,’ उनले भने ।
मेला उद्घाटन कार्यक्रममा लुम्विनी प्रदेश सभा सदस्य समेत रहेका पूर्व कृषि मन्त्री भण्डारीलाल यादवले विकास प्रेमी नेतालाई चिनेर आगामी निर्वाचनमा मतदान गर्नुपर्ने धारणा राखे । उनले कमरशाह बाबा परिसरको विकासका लागि आफूले सक्दो प्रयास गर्ने बताए ।
कमरशाह बाबा मजार ब्यवस्थापन समितिका अध्यक्ष सगिर खाँको अध्यक्षतामा भएको उद्घाटन कार्यक्रममा डुडुवा गाउँपालिका ५ नंं वडा अध्यक्ष झंकबहादुर थापाले कमरशाह बाबा मजार इस्लाम धर्मावलम्वीको मात्र आस्थाको केन्द्र नभई अन्य धर्मावलम्वीको समेत साझा थलो भएको बताए । मेला मंसिर २८ गतेसम्म संचालन हुने समितिका अध्यक्ष खाँले जानकारी दिए ।
Discussion about this post