जनताको सर्वोपरि हितमा लागिरहने पुर्व मन्त्री राईको उद्घोष

बाँके पुस ५ गते ।
जनता समाजवादी पार्टी (जसपा) का महासचिव एवम् पूर्व मन्त्री मोहम्मद इश्तियाक राईले जनताको सर्वोपरि हितमा लागिरहने उद्घोष गरेका छन् । बाँके क्षेत्र नं. ३ का नागरिकसँग खजुरा गाउँपालिका उढरापुर चोकमा प्रत्यक्ष सम्वाद गरेका उनले जनताको हितमा पहिले पनि लागेको र आगामी दिनमा पनि सक्रिय भएर लाग्ने उद्घोष गरेका हुन् ।

निर्वाचनका बेला आफूले गरेको बाचा र योजनाले मूर्त रुप लिइरहेको बताउँदै उनले जनताको मतबाट चुनाव जितेकाहरु दुलोभित्र लुकेको जिकिर गरे । उनले केपी शर्मा ओली, पुष्पकमल दाहाल (प्रचण्ड), शेरबहादुर देउवा, माधवकुमार नेपालको निर्वाचन क्षेत्रभन्दा बाँके क्षेत्र नं. २ मा ५० गुणा राम्रो विकास भएको बताए । ‘बारम्बार प्रधानमन्त्री बन्ने नेताको निर्वाचन क्षेत्रभन्दा बाँके क्षेत्र नं. २ मा ५० गुणा राम्रो विकास भएको म दावीका साथ भन्न सक्छु,’ उनले भने ।उनले प्रतिनिधि सभाको निर्वाचनमा प्राविधिक कारणले हार ब्यहोर्न परेको बताए । उनले जनताका कारण नभई विकास विरोधी ठूला राजनीतिक दल मिलेर हराएको बताए । ‘अघिल्ला निर्वाचनभन्दा गत निर्वाचनमा बढि मत जनताले मलाई दिएकै हुन्, तर मलाई हराउन आफ्नो उम्मेदवारको जमानत जफ्त समेत गराउन भ्याए,’ उनले भने, ‘त्यो हार थिएन प्राविधिक कारणमात्र थियो ।’

उनले काँग्रेसहरु पूर्व प्रधानमन्त्री एवम् नेपाली काँग्रेसका पूर्व सभापति सुशिल कोइरालाको क्षेत्र भनेर फुइँ लगाउनेहरु नै आफ्नो उम्मेदवारको जमानत जफ्त गराउनमा लागेको आरोप लगाए । उनले नेपालगन्ज–गुलरिया सडक खण्डको शिलान्यास गरेको बताउँदै उनले त्यसपछि कुनै योजना शिलान्यास नभएको बताए । ‘नेपालगन्जबाट गुलरिया पुग्न पहिले ३ घण्टा लाग्थ्यो, अहिले ३० मिनेटमा पुगिन्छ,’ उनले भने, ‘शिलान्यास र चुरण मन्त्री भनेर मेरो बदनाम गरियो । मैले शिलान्यास गरेका कुनै योजना निर्माणको क्रममा छन् त कुनै योजना निर्माण भइसकेका छन् । चुरण मन्त्री भन्नेहरुको मुखमा बुजो लागेको छ ।’

उनले भेरी अस्पताल निर्माणका लागि ३ सय २५ करोड रुपैयाँ विनियोजन गर्न लगाए पनि त्यसपछि आएका मन्त्रीले कार्यान्वयन गर्न नसकेको बताए । ‘भेरी अस्पतालको खातामा २५ करोड रुपैयाँ जम्मा गर्न लगाएँ, तर त्यसपछि भेरी अस्पतालमा कुनै रकम आएको छैन,’ उनले भने ।