काठमाडौं माघ ३ गते ।
निर्वाचन आयोगले हिमाली तथा उच्च हिमाली क्षेत्रमा मतपत्रसहितका निर्वाचन सामग्री ढुवानीका लागि १३ वटा व्यवसायिक संस्थालाई सूचीकरण गरेको छ।
आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक मतपत्र, निर्वाचन सामग्री तथा अन्य अत्यावश्यक सामग्री ढुवानी गर्न कुरियर सेवातर्फ दुई वटा फर्म छनोट गरिएको आयोगले जनाएको छ। छनोट भएका कुरियर सेवा प्रदायकमा साझा कुरियर एन्ड कार्गो र ट्रान्स एयर इन्टरनेसनल लजिष्टिक प्रालि रहेका छन्।
आयोगले हेलिकोप्टर सेवाका लागि पनि फर्म वा कम्पनीलाई सूचीकरणका लागि आग्रह गरे पनि हालसम्म कुनै पनि फर्मले आवेदन दर्ता नगराएको जनाएको छ।
त्यसैगरी, ट्रक तथा कन्टेनर सेवा उपलब्ध गराउनेतर्फ ११ वटा फर्म सूचीकरण भएका छन्। सूचीकरण भएका सेवा प्रदायकमा हिमालयन कार्गो लजिष्टिक, वासुकी ट्रान्सपोर्ट, चितवन रोडवेज क्यारियर, न्यू भैरव ट्रान्सपोर्ट र अदिति ट्रान्सपोर्ट रहेका छन्।
यसैगरी ओम ट्रान्सपोर्ट, हरहर महादेव ढुवानी सेवा, देउती बज्यै कन्स्ट्रक्सन एण्ड सप्लायर्स प्रालि, कृष्ण ट्रान्सपोर्ट, धवलागिरि कालिका कन्स्ट्रक्सन एण्ड सप्लायर्स तथा एयर मनकामना कुरियर एन्ड कार्गो प्रालि पनि सूचीकरण भएका छन्।
आयोगका अनुसार गत पुस १७ गते प्रकाशित सार्वजनिक सूचनाअनुसार प्राप्त निवेदनहरूलाई तोकिएका शर्त र वार्षिक औसत कारोबारका आधारमा मूल्यांकन गरी ती फर्म तथा कम्पनीलाई सूचीकरण गरिएको हो।
सूचीकरण गरिएका सेवा प्रदायक संस्थालाई आवश्यकताअनुसार निर्वाचन सामग्री आपूर्तिका लागि परिचालन गरिने आयोगले जनाएको छ।
Discussion about this post