बर्दिया माघ ३ गते ।
मधुवन नगरपालिका–४ स्थित ओरालीबाट ढोढरीतर्फ आउँदै गरेको ईभी गाडी र विपरीत दिशातर्फ जाँदै गरेको मोटरसाइकल एक आपसमा ठोक्किदा दुई जनाको मृत्यु भएको छ ।
बा प्र ०१–०३२च ७५५३ नम्बरको इभी गाडी विपरीत दिशातर्फ जाँदै गरेको भे ११ प १९२३ नम्बरको मोटरसाइकल शुक्रबार राति करिब ९ बजे एक आपसमा ठोक्किएको प्रहरीले जनाएको छ ।
मोटरसाइकल चालक बर्दिया ठाकुरबाबा–५ शाहीपुरका २१ वर्षीय शुशिल कुमार थारु र पछाडि बस्ने सोही पालिका–५ मानपुरका २५ वर्षीय करण थारु घाइते भएका थिए ।
उनीहरुलाई जिल्ला अस्पताल गुलरिया उपचारको लागि तत्काल ल्याइएकोमा राति १० बजेर १० मिनेटमा दुवै जनाको मृत्यु भएको ईलाका प्रहरी कार्यालय, ढोढरीका प्रहरी निरीक्षक महेन्द्र सेनले बताए ।
प्रहरीले इभी गाडीका चालक मधुवन नपा–४ ढोढरीका २३ वर्षीय विक्रम बोहोरालाई नियन्त्रणमा लिएको छ । दुवै सवारी साधन चल्ने अवस्थामा नरहेको प्रहरी निरीक्षक सेनले जनाए । जिल्ला ट्राफिक प्रहरी कार्यालय, बर्दियाका प्रमुख प्रहरी निरीक्षक सन्दीप बेलवासेका अनुसार इभी चालक बोहोराले मापसे गरि गाडी चलाएको खुलेको छ ।
Discussion about this post