बाँके माघ ५ गते ।
नेपालगन्ज उपमहानगरपालिकाका उपमेयर कमरुद्दिन राईले राजिनामा दिएका छन् । आगामी फागुन २१ गते हुने प्रतिनिधिसभा निर्वाचनमा बाँके क्षेत्र नं. २ बाट उम्मेदवारी दिनका लागि उनले राजिनामा दिएका हुन् ।
उनको राजिनामा मेयर प्रशान्त विष्टले सोमवार नै स्वीकृत गरेको उपमहानगरले जनाएको छ । बाँके क्षेत्र नं. २ को समग्र विकासका लागि आफूले प्रतिनिधिसभा निर्वाचनमा उम्मेदवारी दिन लागेको राईले बताए । ‘नेपालगन्जमामात्र सिमित रहन मन लागेन । बाँके क्षेत्र नंं. २ को समग्र विकास विना नेपालगन्जको विकास सम्भव देखिन,’ उनले भने, ‘क्षेत्र नं. २ को विकासको स्पष्ट खाका लिएर चुनावी मैदानमा होमिन लागेको छु ।’
जनता समाजबादी पार्टी नेपाल (जसपा नेपाल) का केन्द्रिय सचिव समेत रहेका राई कम बोल्ने, तर जनताको काममा दिनरात खटिने नेताको रुपमा परिचित छन् । ‘जनताको सेवामा कुनै कमी राख्ने छैन । बाँके क्षेत्र नं. २ का जनताको भावनाको कदर गरि रातदिन खटिने छु,’ उनले भने ।
क्षेत्र नंं. २ को माटो र जनतालाई राम्रोसँग बुझेका उनी जनताको सेवामा चट्टान जस्तै ठिङ्ग उभिदै आएका छन् । राजनीतिलाई समाजसेवाको रुपमा लिँदै आएका राईको राजनीतिक उचाइँ पनि उत्तिकै छ । राजनीतिलाई कमाउने होइन, सेवाको रुपमा लिएको छु र लिइरहने छु । म पदमा भए पनि नभए पनि जनताको सेवामा खटिने छु,’ राईले भने ।
Discussion about this post