बाँके माघ ३ गते ।
अशोक राई नेतृत्वको जनता समाजवादी पार्टी (जसपा)का लुम्बिनी प्रदेशका वरिष्ठ सदस्य माजिद अलि शेषले प्रतिनिधिसभा सदस्यको निर्वाचन लड्ने घोषणा गरेका छन्। बाँके निर्वाचन क्षेत्र नं. २ का इन्चार्जसमेत रहेका शेषले अस्पतालको शैयाबाटै आगामी निर्वाचनमा उम्मेदवारी दिने घोषणा गरेका हुन्।
आगामी फागुन २१ गते हुने प्रतिनिधिसभा सदस्य निर्वाचनका लागि माघ ६ गते उम्मेदवारी मनोनयनको कार्यतालिका रहेको छ। जनसेवामा निरन्तर सक्रिय रहँदै आएका नेता शेष हाल स्पाइनलसम्बन्धी समस्याका कारण भारतको लखनउस्थित एक अस्पतालमा उपचाररत छन्। उनले आफ्नो स्वास्थ्यमा क्रमिक सुधार भइरहेको जानकारी पनि दिएका छन्।
उपचारकै क्रममा रहेका शेषले लखनउस्थित अस्पतालबाट सामाजिक सञ्जाल फेसबुकमार्फत बाँके क्षेत्र नं. २ बाट प्रतिनिधिसभा सदस्यको चुनाव लड्ने घोषणा गरेपछि उक्त क्षेत्रमा राजनीतिक तरंग उत्पन्न भएको छ। उनको घोषणापछि पार्टीभित्र तथा कार्यकर्ता–समर्थकहरूबीच हलचल मच्चिएको छ।
जनताको समस्या समाधानमा सधैं अग्रसर रहने र जनसेवामा समर्पित नेताका रूपमा परिचित शेषको घोषणालाई राजनीतिक रूपमा अर्थपूर्ण रूपमा हेरिएको छ। उनको उम्मेदवारी घोषणाले सोही क्षेत्रका अर्का नेता मोहम्मद इस्तियाक राईलाई समेत ठूलो राजनीतिक झड्का लाग्ने अनुमान गरिएको छ।
हालसम्म शेषले कुन पार्टीबाट उम्मेदवारी दिने भन्ने विषय भने टुंगो लागेको छैन। तर उनले साथीहरू र शुभेच्छुकहरूसँग सल्लाह गरेर चुनाव लड्ने स्पष्ट संकेत गरेका छन्।
Discussion about this post