बाँके माघ २२ गते ।
हरेक वर्ष वर्षायाम सुरु हुनासाथ राप्ती नदीले बाँकेका बस्तीहरू डुबाउँछ, जमिन कटान गर्छ र सयौँ परिवारको भविष्य बगाएर लैजान्छ। तर चुनाव आउँदा भने यही पीडा नेताहरूका लागि केवल भाषणको विषय बन्ने गरेको छ। यही कारण यस पटक राप्ती नदीको डुबान र कटान बाँकेका मतदाताको सबैभन्दा ज्वलन्त चुनावी मुद्दा बनेको छ।
राप्ती नदी आसपासका गाउँका बासिन्दा अब मौन छैनन्। मत माग्न आउने उम्मेदवारलाई उनीहरू सोधिरहेका छन्— “यो पटक पनि आश्वासन मात्रै हो कि साँच्चै समाधान हुन्छ ?”
बाँके निर्वाचन क्षेत्र नम्बर १ र २ अन्तर्गत पर्ने राप्ती नदीको डुबान–कटानले हरेक वर्ष खल्ला झगडिया, चौफेरीलगायतका बस्ती तहसनहस बनाउँदै आएको छ। राप्ती सोनारी–७ खल्ला झगडियाका अरुण यादव भन्छन्, “हरेक चुनावमा डुबान अन्त्य गर्छु भन्नेहरू आए, तर हाम्रो जमिन बगर बन्यो, घर विस्थापित भए। अब झुटा वाचा स्वीकार हुँदैन।”
निर्वाचन क्षेत्र नम्बर १ मा पर्ने खल्ला झगडियामा सयौँ बिघा उब्जाउ जमिन राप्तीले बगाइसकेको छ। बगर बनेको जमिनसँगै सयौँ परिवारको सपना पनि बग्दै गएको स्थानीयको पीडा छ।
उस्तै अवस्था क्षेत्र नम्बर २ अन्तर्गत डुडुवा गाउँपालिका–१ चौफेरीको छ। हरेक निर्वाचनमा तटबन्ध बनाउने, डुबान रोक्ने, पुल निर्माण गर्ने घोषणा भए पनि स्थानीयको नियति भने उही बाढी र विस्थापनमै अड्किएको छ।
चौफेरीका रमेश यादव भन्छन्, “बाढीले घर बगाउँछ, खेत डुबाउँछ, बालबालिकाको भविष्य अनिश्चित बनाउँछ। दशकौँदेखि यही पीडा भोग्दै आएका छौँ, तर समाधान कहिल्यै आएन।” सोही क्षेत्रका राम यादवको आक्रोश अझ चर्को छ। उनी भन्छन्, “यही क्षेत्रबाट प्रधानमन्त्रीदेखि मन्त्रीसम्म बने, तर राप्ती नियन्त्रण र सुरक्षित बसोवासका लागि कसैले गम्भीर पहल गरेन।”
यसैबीच, क्षेत्र नम्बर २ मा मत माग्न पुगेका नेकपा एमालेका उम्मेदवार तथा पूर्वमन्त्री ईश्तियाक राई, नेपाल कम्युनिस्ट पार्टीका दीपेन्द्र विष्ट, नेपाली कांग्रेसका सुधान्सु कोइराला लगायतका उम्मेदवारहरूले यस पटक जसरी पनि डुबान र कटानको स्थायी समाधान गर्ने प्रतिबद्धता जनाएका छन्।
तर स्थानीय सुनिता यादव स्पष्ट भन्छिन्, “अब भाषण र प्रतिबद्धतामा विश्वास छैन। कार्ययोजना र काम देखाउनेलाई मात्र भोट दिने निर्णय गरेका छौँ।”यस पटक बाँकेका मतदाताको सन्देश स्पष्ट छ—बाढीमा बाँच्ने होइन, समाधान दिने नेतृत्व चाहियो।
Discussion about this post