बाँके माघ २५ गते ।
बाँके जिल्लामा पछिल्ला केही दिनयता अत्यधिक चिसो बढेपछि जनजीवन प्रभावित बनेको छ । गत साता परेको वर्षा तथा पहाडी र हिमाली जिल्लामा भएको हिमपातका कारण चिसो पुनः बढेको हो ।
माघको दोस्रो सातामा चिसो केही कम भए पनि त्यसयता फेरि बढ्दै जाँदा सर्वसाधारणको दैनिक जीवनमा समस्या देखिन थालेको स्थानीयले बताएका छन् ।
चिसोका कारण घरबाहिर निस्कन समेत कठिन भएको नेपालगन्ज–२ का स्थानीय कृष्णप्रसाद श्रेष्ठले बताए । उनले अघिल्लो साता कम भएको चिसो पुनः बढ्दा सर्वसाधारण थप समस्यामा परेको उल्लेख गरे ।
त्यस्तै, नेपालगन्जको त्रिभुवन चोकका व्यापारी अतुल गुप्ताका अनुसार चिसो बढेसँगै बजारमा मानिसको आवतजावत र चहलपहल घटेको छ भने व्यापार–व्यवसायसमेत प्रभावित बनेको छ । चिसोका कारण रिक्सा बाहेक अन्य सवारी साधन कम चलेका छन् भने गरिब तथा विपन्न वर्गलाई काम गर्न कठिनाइ भएको उनले बताए ।
चिसो बढेसँगै जिल्लामा मौसमी भाइरल फ्लुका बिरामीको संख्या पनि बढ्दै गएको छ । स्वास्थ्य कार्यालय बाँकेका अनुसार ज्वरो, रुघाखोकी, निमोनिया तथा कोल्ड डायरियालगायतका रोगका बिरामीको संख्या वृद्धि भएको छ ।
स्वास्थ्य कार्यालय बाँकेकी प्रमुख सुनिता पौडेलले चिसो बढेसँगै जिल्लाका विभिन्न स्थानमा भाइरल फ्लु देखिन थालेको भन्दै सर्वसाधारणलाई सचेत रहन आग्रह गरेकी छन् ।
भेरी अस्पतालका सूचना अधिकारी तथा वरिष्ठ फिजिसियन डा. सङ्केतकुमार रिसालका अनुसार उच्च ज्वरो, रुघाखोकी, घाँटी दुख्ने, टाउको दुख्ने, नाक पोल्ने, सिँगान बग्ने र पखालाजस्ता लक्षण भएका बिरामी हाल अस्पतालमा बढी आउने गरेका छन् ।
यसैगरी, सञ्जिविनी अस्पताल नेपालगन्जका मेडिकल सुपरिन्टेन्डेन्ट डा. रोमन किदवाईले पछिल्लो समय अस्पतालमा भाइरल फ्लुका बिरामीको चाप पुनः बढेको जानकारी दिए । उनका अनुसार भाइरल फ्लुबाट पीडित हुनेहरूमा अधिकांश बालबालिका तथा वृद्धवृद्धा रहेका छन् ।
Discussion about this post