बाँके माघ २५ गते ।
बाँके क्षेत्र नम्बर ३ का जनता समाजवादी पार्टी नेपाल (जसपा) का उम्मेदवार सूर्यलाल यादवले मतदाता भेटघाट कार्यक्रमलाई तीव्र बनाएका छन्।
निर्वाचन नजिकिँदै जाँदा उनले क्षेत्र नम्बर ३ का विभिन्न स्थानमा पुगेर मतदातासँग प्रत्यक्ष अन्तरक्रिया तथा साक्षात्कार गरिरहेका छन्।
जनता समाजवादी पार्टी नेपाल बाँकेका अनुसार भेटघाटका क्रममा उम्मेदवार यादवले मधेश र मधेसी समुदायको अधिकार सुनिश्चित गर्न आफू प्रतिबद्ध रहेको स्पष्ट पारेका छन्। उनले गरिब, निमुखा तथा मधेशमा बसोवास गर्ने जनताको हकहितका लागि सदैव आवाज उठाउने प्रतिबद्धता व्यक्त गर्दै जसपा नै मधेसीको अधिकारको सशक्त पक्षधर पार्टी भएको धारणा राखे।
मतदाता भेटघाट कार्यक्रम उत्साहजनक र फलदायी भएको बताउँदै यादवले मतदाताबाट प्राप्त माया, स्नेह र समर्थनले थप ऊर्जा मिलेको उल्लेख गरे। “मतदाताले देखाएको माया र स्नेहले अझ जिम्मेवार भएर काम गर्ने हौसला मिलेको छ,” उनले भने।
स्थानीय मतदाताले पनि उम्मेदवार यादवसँग प्रत्यक्ष संवाद गर्न पाउँदा खुशी व्यक्त गर्दै मधेशका सवाल संसदमा मजबुत रूपमा उठ्ने अपेक्षा राखेका छन्।
Discussion about this post