बाँके फागुन १ गते ।
बाँकेको खजुरास्थित पेडारी नालाको छेउमा शुक्रबार बिहान फेला परेको शङ्कास्पद वस्तुलाई नेपाली सेनाको बम डिस्पोजल टोलीले पड्काएर निष्क्रिय बनाएको छ।
जिल्ला प्रहरी कार्यालय बाँकेका अनुसार नेपालगन्ज–गुलरिया हुलाकी सडकअन्तर्गत खजुराबजार नजिकै निर्माणाधीन पेडारी नालाको पुलमाथि बिहानै शङ्कास्पद अवस्थामा कुकर फेला परेको थियो।
निर्माणाधीन पुलको छेउमा कुकर भेटिएपछि घटनास्थलमा पुगेको प्रहरीले तत्काल क्षेत्रलाई घेराबन्दी गरी हुलाकी राजमार्गमा आवागमन बन्द गराएको थियो। सोही क्रममा प्रहरीले अनुसन्धान सुरु गर्दै नेपाली सेनालाई जानकारी गराएको थियो।
प्रहरी नायब उपरीक्षक दीपक पातलीले उक्त कुकर स्थानीयलाई त्रसित पार्ने उद्देश्यले राखिएको हुन सक्ने प्रारम्भिक अनुमान रहेको बताए। उनले यस प्रकारका वस्तुलाई ‘हुक’ पनि भनिने जानकारी दिए।
नेपाली सेनाले घटनास्थल नियन्त्रणमा लिएर बम डिस्पोजल टोलीमार्फत शङ्कास्पद कुकरलाई सुरक्षित रूपमा पड्काएर निष्क्रिय बनाएको जनाएको छ। प्रहरीका अनुसार घटनास्थलबाट कुनै पर्चा वा जिम्मेवारी लिएको सामग्री फेला परेको छैन।
सेनाको टोलीले शङ्कास्पद वस्तु निष्क्रिय बनाएपछि हुलाकी राजमार्गमा आवागमन पुनः सञ्चालन गरिएको छ। यसअघि नेपालगन्ज–गुलरिया सडकखण्डमा चल्ने सवारी साधनलाई केही घण्टाका लागि वैकल्पिक मार्गबाट सञ्चालन गरिएको प्रहरीले जनाएको छ।
Discussion about this post