बाँके फागुन ४ गते।
प्रतिनिधिसभा सदस्य निर्वाचन नजिकिँदै जाँदा निर्वाचनलाई शान्तिपूर्ण रूपमा सम्पन्न गराउने उद्देश्यले प्रहरीले बाँके जिल्लामा निर्वाचन लक्षित गस्ती तीव्र पारेको छ।
जिल्ला प्रहरी कार्यालय बाँकेका अनुसार निर्वाचनलाई शान्तिपूर्ण, निष्पक्ष र सफल बनाउन जिल्लाका विभिन्न स्थानको अवस्था बुझ्न तथा नागरिकमा सुरक्षाको अनुभूति गराउन गस्ती अभियान सुरु गरिएको हो।
कार्यालयका प्रमुख प्रहरी उपरीक्षक अङ्गुर जिसीले निर्वाचनको मिति नजिकिँदै गर्दा सञ्चालन गरिएको गस्तीमार्फत स्थानीय तहमा सूचना सङ्कलन, जनसम्पर्क अभिवृद्धि तथा जनचेतनामूलक कार्यक्रम सञ्चालन गरिने जानकारी दिए। उनका अनुसार गस्तीमा खटिएको प्रहरी टोलीले विभिन्न स्थानमा पुगेर स्थानीय बासिन्दासँग निर्वाचन तथा अन्य समसामयिक विषयमा भेटघाट र छलफल गर्नेछ। साथै, जनमुखी प्रहरी सेवा प्रवाह गर्दै अपराध रोकथाम तथा नियन्त्रणका लागि वस्तुस्थिति अध्ययन गर्ने कार्यसमेत भइरहेको उनले बताए।
यस्ता गस्ती तथा सुरक्षा गतिविधिले सर्वसाधारणमा सुरक्षाको विश्वास बढ्नुका साथै सम्भावित सुरक्षा जोखिमबारे समयमै जानकारी प्राप्त गरी आवश्यक कदम चाल्न सहज हुने कार्यालयले जनाएको छ।
विगतका निर्वाचनका क्रममा सुरक्षा चुनौती देखिएका क्षेत्र तथा सीमा नजिकका स्थानलाई विशेष प्राथमिकतामा राखेर सुरक्षा रणनीति तयार पारिएको जिल्ला सुरक्षा समिति बाँकेले जनाएको छ।
समितिका संयोजक तथा प्रमुख जिल्ला अधिकारी दिलकुमार तामाङका अनुसार जिल्लामा रहेका १३९ मतदानस्थलमध्ये ६१ वटालाई ‘अति संवेदनशील’ वर्गमा राखी विशेष सुरक्षा व्यवस्था मिलाइनेछ। अति संवेदनशील मतदानस्थलहरूको नियमित अनुगमन र निरीक्षणको कार्यसमेत भइरहेको उनले जानकारी दिए।
Discussion about this post