बाँके फागुन ५ गते।
जिल्ला प्रशासन कार्यालय बाँके ले प्रतिनिधिसभा सदस्य निर्वाचन लक्षित जुलुस, आमसभा तथा भेला आयोजना गर्नुअघि अनिवार्य रूपमा अनुमति लिनुपर्ने जनाएको छ।
कार्यालयले जारी गरेको सूचनाअनुसार निर्वाचन केन्द्रित जुलुस, आमसभा वा भेला गर्न चाहने राजनीतिक दल तथा उम्मेदवारहरूले पूर्वअनुमति लिनुपर्नेछ। निर्वाचन आयोग का अनुसार सोमबारदेखि जुलुस, आमसभा, कोणसभा तथा घरदैलो कार्यक्रम सञ्चालन गर्न पाइने व्यवस्था गरिएको छ।
निर्वाचन आचारसंहिताअनुसार प्रचारप्रसारका क्रममा जुलुस र आमसभा गर्नुअघि अनिवार्य रूपमा अनुमति लिनुपर्ने व्यवस्था रहेको सहायक प्रमुख जिल्ला अधिकारी तथा आचारसंहिता अनुगमन अधिकृत पूर्णबहादुर खत्रीले जानकारी दिए। उनले राजनीतिक दल, उम्मेदवार तथा भातृ संगठनहरूलाई आचारसंहिताको पूर्ण पालना गर्न आग्रह गर्दै सार्वजनिक स्थलमा कार्यक्रम आयोजना गर्नुभन्दा कम्तीमा २४ घण्टा अगावै मिति, समय, मार्ग र स्थान स्पष्ट गरी अनुमति लिनुपर्ने बताए।
अनुमतिका लागि दल वा उम्मेदवारका अधिकृत प्रतिनिधिले जिल्ला प्रशासन कार्यालयमा निवेदन दिन सक्नेछन्। साथै कार्यालयको इमेलमार्फत पनि निवेदन दर्ता गर्न सकिने जनाइएको छ।
यसैबीच, फागुन २१ गते हुने प्रतिनिधिसभा सदस्य निर्वाचनका लागि सोमबारदेखि औपचारिक रूपमा प्रचारप्रसार सुरु भएको छ। मतदान हुने दिनभन्दा १५ दिनअघिदेखि मात्र जुलुस, आमसभा, कोणसभा तथा सञ्चारमाध्यममार्फत प्रचारप्रसार गर्न पाइने कानुनी व्यवस्था रहेको छ।
उक्त व्यवस्थाअनुसार फागुन ४ गतेदेखि फागुन १८ गते राति १२ बजेसम्म राजनीतिक दल तथा उम्मेदवारहरूले प्रचारप्रसार गर्न सक्नेछन्। निर्वाचन आचारसंहिताको पूर्ण पालना गर्दै उम्मेदवार तथा दलहरूले मतदातासमक्ष मत माग्न सक्ने मुख्य निर्वाचन अधिकृतको कार्यालय बाँकेले जनाएको छ।
Discussion about this post