बाँके फागुन ९ गते ।
नेपालगञ्ज नाकाबाट भन्सार कार्यालयले सात महिनाको अवधीमा ११ अर्ब ४ करोड भन्दा बढी राजस्व संकलन गरेको छ ।
नेपालगञ्ज भन्सार कार्यालयले चालु आर्थिक वर्ष २०८२–०८३ को सात महिनामा ११ अर्ब ४ करोड ६५ लाख ८५ हजार रुपैयाँ राजस्व संकलन गरेको सो कार्यालयका प्रमुख जनार्दन पौडेलले बताए ।
उनले चालु आवको सात महिनाको अवधीमा गत आवको सात महिनाको तुलनामा नौ करोड २४ लाख रुपैयाँ भन्दा बढी राजस्व संकलन भइ राजस्व संकलन बृद्धि हुने क्रममा रहेको बताए ।
भन्सार कार्यालयका अनुसार गत आर्थिक वर्षको सात महिनामा नेपालगञ्ज नाकाबाट १० अर्ब ९५ करोड ४१ लाख ८४ हजार रुपैयाँ राजस्व संकलन भएको थियो ।
नेपालगञ्ज भन्सार कार्यालयको तथ्यांक अनुसार, चालु आवका लागि बार्षिक लक्ष्य २४ अर्ब ५४ करोड ५७ लाख ८२ हजार निर्धारण भएकोमा पुस मसान्तसम्म सात महिनामा ११ अर्ब चार करोड ६५ लाख ८५ हजार रुपैयाँ अर्थात लक्ष्यको ४५ प्रतिशत असुली भएको छ ।
लक्ष्य पुरा गर्नका लागि बाँकी रहेका पाँच महिनामा ५५ प्रतिशत राजस्व संकलन गर्नु पर्ने देखिएकोले यो वर्ष पनि लक्ष्य पुरा नहुने संकेत देखिएको नेपालगञ्ज भन्सार कार्यालयका प्रमुख पौडेलले बताए ।
उनले भन्सार कार्यालयको मासिक लक्ष्य अुनसार हालसम्म कुनै पनि महिनामा लक्ष्य अनुसार राजस्व संकलन नभएको देखिएको छ । चालु आवको साउन, भदौ, असोज, कात्तिक, मंसिर, पुस र माघ महिनामा क्रमशः लक्ष्यको ७४, ६९, ८७, ७२, ८३, ८३ र ८८ प्रतिशत मात्र राजस्व असुली भएको छ ।
गत आर्थिक वर्ष २०८१–०८२ मा नेपालगञ्ज भन्सारले लक्ष्यको ७४.६४ प्रतिशत राजस्व संकलन गरेको थियो भने त्यसको अघिल्लो आर्थिक २०८०–०८१ मा ६३.३५ प्रतिशत राजस्व संकलन गरेको थियो ।
नेपाल–भारत सीमाको जमुनाहा नाकामा एकीकृत जाँच चौकी सञ्चालनमा आएपछि आयात निर्यात बृद्धि भइ भन्सार राजस्व वृद्धि हुने अपेक्षा गरिएपनि केही वर्ष यता लक्ष्य पुरा हुन नसकेको भन्सार कार्यालयले जनाएको छ ।
अर्कोतर्फ नेपालगञ्ज भन्सारबाट हुने व्यापार घाटा पनि अतिनै उच्च रहेको पाईएको छ । आयात–निर्यातको अनुपातमा निकै ठूलो फरक देखिंदै आएको छ ।
Discussion about this post