वीरगञ्ज फागुन ११ गते ।
पर्साको वीरगञ्ज महानगरपालिका क्षेत्रमा अनिश्चितकालीन कफ्र्यु आदेश जारी गरिएको छ। वीरगञ्ज क्षेत्रमा सोमबार बिहान ९ः४५ बजेदेखि अर्को आदेश नभएसम्मका लागि कफ्र्यु लागू गरिएको हो। प्रमुख जिल्ला अधिकारी भोला दहालद्वारा जारी आदेशअनुसार उक्त निर्णय गरिएको जनाइएको छ।
पछिल्लो सुरक्षा अवस्थालाई मध्यनजर गर्दै स्थानीय प्रशासन ऐन, २०२८ को दफा ६ (क) बमोजिम कफ्र्यु आदेश जारी गरिएको जिल्ला प्रशासन कार्यालय पर्सा ले जनाएको छ। आदेशअनुसार तोकिएको क्षेत्रभित्र कुनै पनि व्यक्ति आवतजावत गर्न, भेला हुन, जुलुस, प्रदर्शन, सभा, बैठक वा घेराउ गर्न निषेध गरिएको छ।
प्रशासनका अनुसार कफ्र्यु पूर्वमा बाइपास रोड, पश्चिममा सिरिसिया नदी, उत्तरमा गण्डक चोक र दक्षिणमा शंकराचार्य गेटसम्म लागू हुनेछ।
कफ्र्यु अवधिभर अत्यावश्यक सेवाका सवारी साधनलाई भने सहजीकरण गरिने जनाइएको छ। एम्बुलेन्स, दमकल, शव वाहन, स्वास्थ्यकर्मीका सवारी साधन, सञ्चारकर्मी, विश्वविद्यालयका पूर्वनिर्धारित परीक्षाका परीक्षार्थी तथा परीक्षा केन्द्रमा खटिने कर्मचारी, पर्यटक सवारी साधन, मानवअधिकार तथा कूटनीतिक नियोगका सवारी साधन र हवाई टिकटको आधारमा यात्रा गर्ने यात्रुहरूलाई सुरक्षा निकायमार्फत आवतजावतमा सहुलियत प्रदान गरिने प्रशासनले स्पष्ट पारेको छ।
जिल्ला प्रशासन कार्यालयले सर्वसाधारणलाई कफ्र्यु आदेशको पूर्ण पालना गर्न आग्रह गरेको छ।
Discussion about this post