बाँके फागुन ११ गते ।
प्रतिनिधिसभा सदस्य निर्वाचन २०८२ का लागि बाँके जिल्लामा उम्मेदवार बनेका ५६ जनामध्ये हालसम्म ३० जनाले मात्र निर्वाचन खर्च प्रयोजनका लागि अनिवार्य बैंक खाता खोलेका छन्।
निर्वाचन आचारसंहिता अनुगमन समितिका अनुसार निर्वाचन क्षेत्र नम्बर १ मा आठ, क्षेत्र नम्बर २ मा १३ र क्षेत्र नम्बर ३ मा नौ जना उम्मेदवारले बैंक खाता खोलेका हुन्।
कोष तथा लेखा नियन्त्रक कार्यालय बाँकेका प्रमुख कोष नियन्त्रक तथा निर्वाचन आचारसंहिता अनुगमन अधिकृत सर्वोदय उपाध्यायले जिल्लामा हालसम्म ३० जनाले मात्र खाता खोलेको जानकारी दिए। उनका अनुसार १० जना उम्मेदवारले खाता खोल्नका लागि सिफारिस पत्र लिएर गएका छन्। फागुन ४ गतेभित्र सबै उम्मेदवारले खाता खोलिसक्नुपर्ने व्यवस्था रहे पनि अझै २६ जनाले खाता नखोलेकाले उनीहरूलाई पटक–पटक फोनमार्फत ताकेता गरिएको उपाध्यायले बताए।
अनुगमन अधिकृत उपाध्यायले भने, “फोन गरेर ताकेता गर्दा खाता खोल्ने प्रतिबद्धता सबैले जनाउनुहुन्छ, तर कार्यान्वयन भएको पाइएको छैन। हामीले निरन्तर ताकेता गरिरहेका छौँ।” समितिका अनुसार खाता नखोल्नेमा अधिकांश स्वतन्त्र उम्मेदवार रहेका छन्।
निर्वाचन आचारसंहिताअनुसार उम्मेदवारले व्यक्तिगत खाताबाट खर्च नगरी निर्वाचन प्रयोजनका लागि छुट्टै बैंक खाता प्रयोग गर्नुपर्ने व्यवस्था छ। सो व्यवस्थाको कार्यान्वयनबारे निरन्तर अनुगमन भइरहेको बाँकेका सहायक प्रमुख जिल्ला अधिकारी तथा अनुगमन अधिकृत पूर्ण खत्रीले जानकारी दिए। उनका अनुसार उम्मेदवारको नाम, दल, निर्वाचन क्षेत्र र बैंक विवरणसहितको प्रतिवेदन निर्वाचन आयोगमा पठाइँदै छ।
तीन निर्वाचन क्षेत्र रहेको बाँकेमा ५६ जना उम्मेदवार चुनावी प्रतिस्पर्धामा छन्। निर्वाचन आयोगले क्षेत्र नम्बर १ का लागि ३१ लाख रुपैयाँ र क्षेत्र नम्बर २ तथा ३ का लागि २९ लाख रुपैयाँसम्म खर्चको सीमा निर्धारण गरेको छ।
Discussion about this post