माघ महिनामा बाँकेमा २०६ उजुरी, १४३ मुद्दा दर्ता

बाँक फागुन ११ गते ।
जिल्ला प्रहरी कार्यालय बाँकेमा माघ महिनामा मात्र महिला, बालबालिका तथा ज्येष्ठ नागरिकसम्बन्धी २०६ वटा उजुरी परेको प्रहरीले जनाएको छ।

जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरीक्षक दिपक पातलीका अनुसार ती उजुरीमध्ये १८० वटा फछ्र्यौट भइसकेका छन् भने २६ वटा फछ्र्यौट हुन बाँकी रहेका छन्। पछिल्लो समयमा महिला, बालबालिका तथा ज्येष्ठ नागरिकसँग सम्बन्धित विभिन्न प्रकारका घटनामा वृद्धि देखिएको उनले बताए।

सोही अवधिमा घरेलु हिंसाअन्तर्गत ४० वटा उजुरी दर्ता भएकोमा २५ वटा उजुरी मिलापत्रमार्फत समाधान गरिएको कार्यालयले जनाएको छ। प्रहरीका अनुसार माघ महिनामा जिल्ला प्रहरी कार्यालयमा ३५३ वटा ठाडो उजुरी परेका थिए। तीमध्ये १६७ वटा उजुरी सोही महिनामै फछ्र्यौट गरिएको, एउटा उजुरी सम्बन्धित निकायमा लेखी पठाइएको र १८६ वटा उजुरी फछ्र्यौट हुन बाँकी रहेको जानकारी दिइएको छ।

प्रवक्ता पातलीका अनुसार सोही अवधिमा आर्थिक अपराधका ३४ वटा घटना दर्ता भएका छन्। महिला, बालबालिका तथा ज्येष्ठ नागरिकसँग सम्बन्धित सात वटा मुद्दा पनि दर्ता गरिएको छ। माघ महिनामा जिल्लाभर विभिन्न प्रकृतिका १४३ वटा मुद्दा दर्ता भएका छन्। तीमध्ये ६ वटा जघन्य अपराध, ५५ वटा गम्भीर अपराध र ८२ वटा सामान्य अपराधका मुद्दा रहेका छन्। ती मुद्दाहरूमा अनुसन्धानका लागि प्रहरीले १३३ जनालाई नियन्त्रणमा लिई अनुसन्धान अघि बढाएको जनाएको छ।