बाँके फागुन १२ गते ।
निर्वाचन नजिकिँदै जाँदा राजनीतिक दलहरूले फेरि एकपटक रासायनिक मल कारखाना सञ्चालन तथा कृषकलाई सहज रूपमा मल उपलब्ध गराउने प्रतिबद्धता दोहो¥याएका छन् । तर विगतका निर्वाचनमा गरिएका यस्ता वाचा कार्यान्वयनमा नआएकाले बाँके र बर्दियाका कृषक भने यसपटकका घोषणाप्रति खासै आशावादी देखिँदैनन् ।
स्थानीय तह, प्रदेश सभा र प्रतिनिधि सभा निर्वाचनका प्रत्येक चरणमा दलहरूले रासायनिक मल उत्पादन र आपूर्ति व्यवस्थापनलाई प्रमुख चुनावी एजेन्डा बनाउँदै आएका छन् । कृषकहरूका अनुसार निर्वाचनपछि ती प्रतिबद्धता कागजमै सीमित हुने गरेका छन् ।
यतिबेला जिल्लामा गहुँबाली हरियाली देखिए पनि समयमै मल नपाए उत्पादन घट्ने चिन्ता कृषकमा बढ्दो छ । निर्वाचन प्रचारप्रसार तीव्र बन्दै जाँदा ग्रामीण भेगका किसान भने खेतबारीमा मलको जोहो गर्न व्यस्त छन् । उनीहरूका लागि निर्वाचनभन्दा बाली जोगाउनु नै प्राथमिक विषय बनेको छ ।
गुलरिया नगरपालिका–४, सुहेलवाका कृषक पप्पु पठान भन्छन्, “निर्वाचन त आउँछ र जान्छ, तर कृषकको समस्या उस्तै छ । समयमै मल पाइयो भने मात्रै राहत मिल्छ ।”
त्यस्तै बारबर्दिया नगरपालिका–४, पदनाहका कृषक नवीन चौधरी मल खोज्न नेपाल–भारत सीमावर्ती क्षेत्रसम्म जानुपर्ने बाध्यता रहेको बताउँछन् । “साइकलमा २० किलोमिटर टाढा गएर एक बोरा युरिया ल्याउनुपर्छ । निर्वाचित भएपछि कसैले पनि हाम्रो समस्या सम्झँदैन,” उनले गुनासो गरे ।
बाँकेको डुडुवा गाउँपालिका–१, का रंगीलाल यादवका अनुसार समस्या केवल मल अभावमा मात्र सीमित छैन । “मल नपाउँदा उत्पादन घट्छ, उत्पादन भए पनि उचित मूल्य पाइँदैन । किसान दोहोरो मारमा परेका छन्,” उनले भने । उनका अनुसार जिल्लाका धेरै कृषक सीमावर्ती भारतीय बजारमा मल खोज्न बाध्य छन् । खेतमा समयमै मल प्रयोग नगर्दा उत्पादन घट्ने र त्यसले वर्षभरको जीविकोपार्जनमा प्रत्यक्ष असर पर्ने उनीहरूको भनाइ छ ।
राजनीतिक दलहरूले आफ्नो चुनावी घोषणापत्रमा मल आपूर्ति सहज बनाउने र स्वदेशमै मल कारखाना स्थापना गर्ने योजना अघि सारे पनि कार्यान्वयन अभावका कारण ती प्रतिबद्धता विश्वसनीय बन्न सकेका छैनन् । कृषकहरू भने यसपटकका उम्मेदवारबाट प्रतिबद्धता मात्र होइन, व्यवहारमा परिणाम देख्न चाहेको बताउँछन् ।
Discussion about this post