बाँके फागुन १२ गते ।
नेपाली कांग्रेसले बाँकेको प्रतिनिधिसभा क्षेत्र नम्बर २ का उम्मेदवार शुधान्सु कोइरालाको संकल्प पत्र मंगलबार सार्वजनिक गरेको छ। नेपालगन्जमा औपचारिक समारोहका बीच उक्त संकल्प पत्र सार्वजनिक गरिएको हो।
नेपाली कांग्रेसका पूर्वसभापति एवं पूर्वप्रधानमन्त्री स्वर्गीय सुशिल कोइराला चुनाव लड्दै आएको क्षेत्रमा उनका भतिज एवं कांग्रेस बाँकेका जिल्ला सचिव शुधान्सु प्रतिनिधिसभा सदस्य पदको उम्मेदवार छन्। कांग्रेसले कानुन÷न्याय, सुशासन, भौतिक पूर्वाधार र विकास, उद्योग व्यवसाय प्रवद्र्धन, पर्यटन विकास, वातावरण संरक्षण, कृषि तथा उद्यमशिलता, शिक्षा, स्वास्थ्य, यूवा÷खेलकुदको उत्थान र धर्म÷संस्कृति जगेर्नाप्रतिको संकल्पलाई बुँदागत रूपमा समेटेको छ।
उम्मेदवार कोइरालाले सुशासनतर्फ भ्रष्टाचार नियन्त्रणका लागि शून्य सहनशीलता नीतिलाई कार्यान्वयन गर्न पहल गर्ने, सरकार वा संस्थाको काम पारदर्शी र स्पष्ट हुनुका साथै निर्णय, बजेट, योजनाबारे नागरिकले थाहा पाउनुपर्ने मान्यतालाई व्यवहारमा ल्याउन जोड दिने, सूचनाको हकको पूर्ण कार्यान्वयनको वातावरण बनाउन भूमिका खेल्ने, जिम्मेवार तहमा रहेका सबैले आफ्नो काम, कर्तव्यप्रति जवाफदेही हुँदै असललाई पुरस्कृत र खराबलाई दण्ड दिने नीति÷संस्कृति अवलम्बन गर्न भूमिका निर्वाह गर्ने लगायत संकल्प गरेका छन्।
यस्तै भौतिक पूर्वाधार र विकासतर्फ नेपालगन्जमा वृहत चक्रपथ (रिङरोड) परियोजनालाई मूर्त रुप दिन पहल गर्ने, नेपालगन्ज र डुडुवा क्षेत्रका भौतिक पूर्वाधार (सडक, ढल, नाला) निर्माणका लागि विशेष प्राथमिकता दिने, ग्रामीण क्षेत्रमा रहेका फुसको छानालाई विस्थापित गरी कर्कट पाता लगायतको वैकल्पिक छानो व्यवस्थाका लागि पहल गर्ने लगायतका संकल्प गरिएको छ।
यसैगरी उद्योग, व्यवसाय प्रवद्र्धनतर्फ भारतसँगको आयात–निर्यात सहजताका लागि आइसीपीको प्रभावकारी सञ्चालन गरिने, खुला सिमानाका कारण हुने चोरी, पैठारीलाई निरुत्साहित गर्न भन्सार मूल्यांकनलाई पुनरावलोकनका लागि आवश्यक नीति तर्जुमा गर्न आवश्यक पहल गर्ने, नयाँ उद्योग स्थापनाको लागि करमैत्री नीति लागु गर्न अग्रसर रहने, स्थानीय उद्योगलाई प्रोत्साहन, प्रवद्र्धन र बजारीकरण गर्न आवश्यक पहल गर्ने लगायत संकल्प गरिएको छ।
त्यस्तै राँझा विमानस्थललाई अन्र्तराष्ट्रिय विमानस्थलका रुपमा रुपान्तरण गर्न अग्रसरता लिइने, नेपालगन्ज–दिल्ली लगायत भारतीय शहरमा हवाई उडानका लागि कूटनीतिक पहल गर्ने, बागेश्वरी मन्दिर, जुँगे खडेश्वर महादेव, गौशाला हनुमान मन्दिर(१०८ फिट), राप्ती(सिधनियाघाट), राप्ती गंगा महाआरती, बेतहनी पाँझस्थित शिवधाम लगायत क्षेत्रलाई धार्मिक, साँस्कृतिक पर्यटकीय गन्तव्यका रुपमा स्थापित गर्न योजना अनुरुप कार्य सम्पन्न गर्न आवश्यक पहल गर्ने लगायत रहेका छन्।
उम्मेदवार कोइरालाले ऐतिहासिक, साँस्कृतिक, धार्मिक र बहुभाषिक यस क्षेत्रलाई शान्त, सद्भाव र समृद्ध क्षेत्रको रुपमा विकसित गर्न आवश्यक पहल गर्ने, ऐतिहासिक, धार्मिक तथा साँस्कृतिक महत्वका क्षेत्रको संरक्षण र सम्वद्र्धन गरिने, सामाजिक, धार्मिक सद्भाव कायम राख्न पूर्ण प्रतिवद्धता व्यक्त गरेका छन्।
त्यसैगरी कोइरालाले नेपालको संविधान २०७२ को कार्यान्वयन प्रक्रियामा प्रतिबद्ध रहँदै जनचाहनालाई उच्च प्राथमिकता दिदैं आवश्यक संशोधनका लागि पहल गर्ने, राष्ट्रिय वन तथा सामुदायिक वनको संरक्षण÷सम्वद्र्धन गर्न आवश्यक पहल गर्ने, कृषिलाई उच्च प्राथमिकता दिँदै खेतीका लागि आवश्यक सिँचाइको व्यवस्था गर्न पहल गर्ने, गुणस्तरिय शिक्षाका लागि विद्यालय÷कलेज÷विश्वविद्यालयलाई डिजिटलाइजेशन, प्रयोगशाला लगायतको स्तरोन्नति गर्दै शैक्षिक सुधारको प्रयास गर्ने संकल्प गरेका छन्।
यस्तै भेरी अस्पताललाई ५ सय शैयाको स्तरोन्नतीका लागि पहल गर्ने, साथै पुरानो ओपिडी ब्लकलार्य भत्काएर अत्याधुनिक ब्लक निर्माणका लागि द्रुत गतिमा प्रक्रिया अगाडि बढाउन पहल गर्ने, युवा नीति कार्यान्वयनमा जोड दिइने, खेलकुदको समग्र विकासका लागि क्रिकेट, फुटबल लगायतकाखेल मैदान निर्माण गर्न आवश्यक पहल गर्ने संकल्प पनि गरिएको छ।
कोइरालाले लोकतन्त्र, संविधान, विधिको शासन, सामाजिक न्याय, मानव अधिकार, प्रेस तथा अभिव्यक्ति स्वतन्त्रताका पक्षमा सदैव अग्रसर रहने प्रतिवद्धता व्यक्त गर्दै कटिबद्ध भएर प्रस्तुत हुनेमा दृढ संकल्प पनि गरेका छन्।
नेपाली कांग्रेस बाँके क्षेत्र नम्बर २ का सभापति रमेशकुमार गुप्ताको सभापतित्वमा भएको कार्यक्रममा प्रमुख अतिथी एवम् राष्ट्रिय सभाका सदस्य तथा कांग्रेस बाँकेका पूर्वसभापति युवराज शर्मा, कांग्रेस बाँकेका कार्यवाहक सभापति गोपालप्रसाद अधिकारी लगायतले नेपाली कांग्रेसले बाँकेको क्षेत्र नम्बर २ मा शुधान्सु कोइराला जस्तो योग्य र क्षमतावान व्यक्तिलाई उम्मेदवार बनाएको दाबी गरे।
Discussion about this post