बाँके फागुन १३ गते ।
प्रतिनिधि सभा सदस्य निर्वाचनलाई लक्षित गर्दै बाँके जिल्लाका आठ वटै पालिकामा मतदाता शिक्षा अभियान तीव्र रूपमा सञ्चालन भइरहेको छ । सोही क्रममा नरैनापुर गाउँपालिकामा पनि अभियानलाई प्राथमिकताका साथ अघि बढाइएको छ ।
गाउँपालिकाका अध्यक्ष इस्तियाक अहमद शाहले विगतका निर्वाचनमा यस पालिकामा बदर मतको संख्या उच्च रहनुका साथै मतदान प्रतिशतसमेत न्यून देखिएको स्मरण गर्दै यस पटक शतप्रतिशत सदर मत खसाल्ने र समग्र मतदान दर बढाउने लक्ष्यसहित अभियान सञ्चालन गरिएको बताए । उनका अनुसार बदर मत न्यून गर्ने तथा मतदाताको सहभागिता वृद्धि गर्ने उद्देश्यले स्वयंसेवकहरू गाउँबस्ती तथा घरदैलोमै पुगेर मतदातालाई सचेत बनाइरहेका छन् ।
गाउँपालिकाकी सूचना प्रविधि अधिकृत तथा मतदाता शिक्षा अनुगमनकर्ता जुना शाहीले फागुन ३ गतेदेखि नै नरैनापुरमा मतदाता शिक्षा कार्यक्रम प्रभावकारी रूपमा सुरु गरिएको जानकारी दिइन् । सुरुका दिनमा बस्तीस्तरमा सामूहिक रूपमा शिक्षा प्रदान गरिएको र हाल घरघरमै पुगेर मतदातासँग प्रत्यक्ष भेटघाट गरी मतदानको अभ्याससमेत गराइँदै आएको उनले बताइन् ।
अनुगमनकर्ता शाहीका अनुसार मतदाता शिक्षाका लागि तयार पारिएका पाठ्यसामग्रीमार्फत मतदान प्रक्रिया, मत बदर हुने अवस्था तथा त्यसबाट जोगिने उपायबारे स्पष्ट जानकारी दिइँदै आएको छ । “यस पटक मतदाताले उत्साहका साथ शिक्षा लिँदै हुनुहुन्छ, जसले बदर मत घट्ने विश्वास लिएका छौँ,” उनले भनिन् ।
नरैनापुर गाउँपालिका–१ की मतदाता रिना यादवले मतदाता शिक्षामा सहभागी भएपछि यस पटक आफ्नो मत बदर नहुनेमा विश्वस्त भएको बताइन् । उनले मतदान प्रक्रिया बुझ्न पाउँदा आफूमा आत्मविश्वास बढेको उल्लेख गरिन् ।
Discussion about this post