बाँके फागुन १८ गते ।
प्रतिनिधि सभा सदस्य निर्वाचनको मिति नजिकिँदै जाँदा रोजगारीका लागि भारतका विभिन्न सहरमा गएका नेपाली नागरिक मताधिकार प्रयोग गर्न स्वदेश फर्किने क्रम बढ्दै गएको छ । रोजगारीका सिलसिलामा भारत पुगेका नेपालीहरू ठूलो संख्यामा बाँकेको जमुनाह नाका हुँदै नेपाल भित्रिरहेको इलाका प्रहरी कार्यालय जमुनाहले जनाएको छ ।
इलाका प्रहरी कार्यालय जमुनाहका प्रमुख प्रहरी निरीक्षक किरण मल्लका अनुसार पछिल्लो समय नेपालबाट भारततर्फ जानेभन्दा भारतबाट नेपाल फर्किने नेपालीको संख्या उल्लेख्य रूपमा बढेको छ । उनले निर्वाचनमा सहभागिता जनाउनकै उद्देश्यले नाका हुँदै स्वदेश फर्किनेको संख्या वृद्धि भएको बताए । उनका अनुसार हाल दैनिक पाँच सयदेखि एक हजारसम्म नेपाली यस नाका हुँदै नेपाल प्रवेश गरिरहेका छन् ।
प्रहरी निरीक्षक मल्लले स्वदेश फर्किने नागरिकको सहज आवागमनका लागि आवश्यक समन्वय र व्यवस्थापन मिलाइएको जानकारी दिए । नाकामा भेटिएका अधिकांश नेपालीले निर्वाचनमा मतदान गर्नकै लागि आफूहरू स्वदेश फर्किएको बताएका छन् ।
दैलेखको नौमुले गाउँपालिकाका नरेश थापाले मतदानका लागि विशेष बिदा लिएर नेपाल फर्किएको बताए । उनले देशलाई सक्षम, इमानदार तथा जनमुखी नेतृत्व आवश्यक रहेको उल्लेख गर्दै भने, “देशमै रोजगारी सिर्जना गर्ने र युवालाई विदेशिनु नपर्ने वातावरण बनाउने नेतृत्व चाहिन्छ । हाम्रो अपेक्षा त्यही हो ।”
त्यस्तै, सुर्खेतको छिन्चुका सुरेश खड्काले आफ्नो क्षेत्रमा युवाका लागि काम गर्न सक्ने उम्मेदवारलाई जिताउने उद्देश्यले स्वदेश फर्किएको बताए ।
जाजरकोटको ढिमे घर भएका भीमबहादुर सिंह पनि आफ्ना छ जना साथीसँगै स्वदेश फर्किएका छन् । भारतको हिमाचल प्रदेशस्थित रामपुरमा रोजगारी गर्दै आएका उनले निर्वाचनलाई परिवर्तन र देश निर्माणको अवसरका रूपमा लिनुपर्ने धारणा व्यक्त गरे । सिंहले भने, “अबको निर्वाचन परिवर्तन र देश बनाउने दिशामा केन्द्रित हुनुपर्छ । भ्रष्टाचार र ढिलासुस्तीलाई अब छुट दिनुहुँदैन । मतदान गर्दा यी विषयमा सजग हुन आवश्यक छ ।”
जमुनाह नाकामा भेटिएका अधिकांश फर्किएका नेपालीले स्वदेशमै रोजगारीको वातावरण निर्माण गर्ने, सबैलाई समान अवसर प्रदान गर्ने र समावेशी नीति अपनाउने उम्मेदवार तथा दललाई समर्थन गर्ने धारणा व्यक्त गरेका छन् ।
Discussion about this post