बाँके फागुन १८ गते।
नेपालगन्ज भन्सार कार्यालयबाट चालु आर्थिक वर्ष २०८२÷८३ को सात महिनामा विभिन्न १८ देशबाट ४४ अर्ब रुपैयाँभन्दा बढीको मालसामान आयात भएको छ। भन्सार कार्यालयका प्रमुख जनार्दन पौडेलका अनुसार सो अवधिमा भारतलगायत १८ देशबाट कुल ४४ अर्ब ५४ करोड २१ लाख ६६ हजार रुपैयाँ बराबरको वस्तु आयात गरिएको हो।
देशअनुसार आयातको विवरणमा सबैभन्दा बढी आयात भारतबाट भएको छ। भारतबाट मात्रै ४१ अर्ब ५ करोड ९७ लाख ९७ हजार रुपैयाँ बराबरको मालसामान आयात भएको छ। त्यसैगरी चीनबाट २ अर्ब ५२ करोड ५० लाख ७० हजार रुपैयाँ बराबरको वस्तु आयात भएको भन्सार कार्यालयले जनाएको छ।
भारत र चीनबाहेक अस्ट्रेलिया, इटाली, मलेसिया, अमेरिका, डेनमार्क, स्पेन, इन्डोनेसिया, साउदी अरब, सिङ्गापुर, दक्षिण अफ्रिका, थाइल्यान्ड, संयुक्त अरब इमिरेट्स, श्रीलङ्का र भियतनामलगायत अन्य देशबाट समेत मालसामान आयात भएको छ।
निर्यात न्यून, व्यापार घाटा उच्च
उक्त अवधिमा नेपालबाट भने दुई देशमा मात्रै निर्यात भएको छ। कुल १ अर्ब ६३ करोड २० लाख ६९ हजार रुपैयाँ बराबरको वस्तु निर्यात गरिएको छ। जसमध्ये भारततर्फ १ अर्ब ६३ करोड ५ लाख ५४ हजार रुपैयाँ र संयुक्त अरब इमिरेट्सतर्फ १५ लाख १४ हजार रुपैयाँ बराबरको निर्यात भएको जनाइएको छ।
आयातको तुलनामा निर्यात न्यून हुँदा चालु आर्थिक वर्षको सात महिनामा व्यापार घाटा ९६.४१ प्रतिशत पुगेको भन्सार प्रमुख पौडेलले जानकारी दिनुभयो। अघिल्लो आर्थिक वर्षको सोही अवधिमा व्यापार घाटा ९६.४२ प्रतिशत रहेको थियो।
राजस्व सङ्कलन लक्ष्यभन्दा कम
चालु आर्थिक वर्ष २०८२÷८३ का लागि २४ अर्ब ५४ करोड ५७ लाख ८२ हजार रुपैयाँ राजस्व सङ्कलन गर्ने लक्ष्य निर्धारण गरिएको छ। तर, माघ मसान्तसम्म ११ अर्ब ४ करोड ६५ लाख ८५ हजार रुपैयाँ मात्र असुली भएको छ, जुन लक्ष्यको ४५.०१ प्रतिशत हो।
लक्ष्य पूरा गर्न बाँकी पाँच महिनामा ५५ प्रतिशत राजस्व सङ्कलन गर्नुपर्ने चुनौती रहेको प्रमुख पौडेलले बताउनुभयो। मासिक लक्ष्यअनुसार हालसम्म कुनै पनि महिनामा लक्ष्य पूरा हुन नसकेको पनि उहाँले स्पष्ट गर्नुभयो।
गत आर्थिक वर्ष २०८१÷८२ मा भन्सार कार्यालयले लक्ष्यको ७४.६४ प्रतिशत राजस्व सङ्कलन गरेको थियो भने आर्थिक वर्ष २०८०÷८१ मा ६३.३५ प्रतिशत राजस्व सङ्कलन भएको थियो।
नेपाल–भारत सीमास्थित जमुनाह नाकामा एकीकृत जाँचचौकी सञ्चालनमा आएपछि आयात–निर्यात वृद्धि भई राजस्व वृद्धि हुने अपेक्षा गरिए पनि पछिल्ला केही वर्षदेखि लक्ष्यअनुसार राजस्व सङ्कलन हुन नसकेको भन्सार प्रमुखको भनाइ छ।
Discussion about this post