बाँके चैत ८ गते।
बाँके जिल्लामा गत एक महिनाको अवधिमा भएका सवारी दुर्घटनामा चार जनाको मृत्यु भएको छ भने ४६ जना घाइते भएका छन्।
जिल्ला प्रहरी कार्यालय बाँकेका अनुसार फागुन महिनाभरि ३३ वटा सवारी दुर्घटना हुँदा कुल ४८ वटा सवारी साधन संलग्न भएका थिए।
जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरीक्षक दीपक पातलीका अनुसार ती दुर्घटनामध्ये अधिकांश तिव्र गतिका कारण भएका हुन्। उनका अनुसार २४ वटा दुर्घटना तिव्र गतिका कारण भएका छन् भने चालकको लापरवाहीका कारण छ वटा, मादक पदार्थ सेवनका कारण एउटा र छाडा चौपायाका कारण एउटा दुर्घटना भएको पाइएको छ।
प्रहरीका अनुसार दुर्घटना न्यूनीकरणका लागि चेतनामूलक कार्यक्रम सञ्चालन तथा चेकजाँचलाई कडा पारिए पनि तिव्र गतिमा सवारी चलाउने प्रवृत्ति पूर्ण रूपमा नियन्त्रणमा आउन सकेको छैन।
यसैबीच, फागुन महिनामा ट्राफिक नियम उल्लङ्घन गर्ने एक हजार ६४१ वटा सवारी साधनमाथि कारबाही गरिएको छ। उक्त कारबाहीबाट १३ लाख ८२ हजार ५०० रुपैयाँ राजस्व सङ्कलन भएको जिल्ला प्रहरी कार्यालयले जनाएको छ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले तिव्र गति र मादक पदार्थ सेवन गरी सवारी चलाउनेमाथि निगरानी थप कडा बनाइएको बताए। उनले ट्राफिक प्रहरीले जिल्लाका विभिन्न स्थानमा दैनिकजसो सचेतनामूलक कार्यक्रम सञ्चालन गरी सवारी चालकलाई गति नियन्त्रण र ट्राफिक नियम पालनाबारे जानकारी गराउँदै आएको उल्लेख गरे।
Discussion about this post