बाँके चैत ९ गते ।
बाँके कारागारमा क्षमताभन्दा बढी कैदीबन्दी राखिएको पाइएको छ। अनौपचारिक क्षेत्र सेवा केन्द्र (इन्सेक) र एडभोकेसी फोरम नेपालले गरेको संयुक्त अनुगमनका क्रममा सात सय क्षमताको कारागारमा ८८९ कैदीबन्दी तथा थुनुवा राखिएको भेटिएको हो।
अनुगमनका क्रममा कैदीबन्दीहरूले एउटै कोठामा १२ देखि ४० जनासम्म बस्नुपरेको, शौचालय प्रयोगका लागि लामो समय पालो कुर्नुपर्ने तथा स्वास्थ्य सेवा र पठनपाठनका व्यवस्थित सुविधा अभावका कारण दैनिक जीवन कष्टकर बनेको बताएका छन्।
एडभोकेसी फोरम नेपालका क्षेत्रीय संयोजक अधिवक्ता बसन्त गौतमले क्षमताभन्दा बढी कैदीबन्दी राखिनु मानव अधिकार उल्लङ्घनको गम्भीर विषय भएको उल्लेख गर्दै आधारभूत स्वास्थ्य सेवा, सरसफाइ, शौचालय सुविधा, न्यायिक प्रक्रिया र शिक्षा सुनिश्चित गर्न सम्बन्धित निकायले तत्काल कदम चाल्नुपर्ने बताएका छन्।
त्यसैगरी अनुगमन टोलीले जिल्ला प्रहरी कार्यालय बाँकेको हिरासत कक्षको पनि निरीक्षण गरेको थियो। सो हिरासतमा हाल ६१ जना थुनुवा रहेका छन्। केही थुनुवाको म्याद थप नगरी अनुसन्धान भइरहेका अवस्थाहरू समेत भेटिएको संयोजक गौतमले जानकारी दिए।
अनुगमन टोलीले कारागारमा रहेका कैदीबन्दीहरूको आधारभूत मानव अधिकार, स्वास्थ्य, सरसफाइ तथा न्यायिक प्रक्रियामा देखिएका समस्याहरूको विस्तृत अध्ययन आवश्यक रहेकोमा जोड दिएको छ। टोलीका अनुसार कारागार व्यवस्थापन, दैनिक जीवनयापन र आधारभूत अधिकारको सुनिश्चितता अझै चुनौतीपूर्ण रहेको छ। इन्सेकका कार्यक्रम अधिकृत टेकनाथ आचार्यले थुनुवाहरूका लागि आधारभूत मानव अधिकार, गुणस्तरीय स्वास्थ्य सेवा र खानाको स्तर सुधार गर्न सम्बन्धित निकायसँग आग्रह गरेका छन्।
नौवस्ता कारागारमा हाल ६९१ जना कैदीबन्दी रहेका छन्। अनुगमन टोलीले आवास क्षमता विस्तार, भीडभाड व्यवस्थापन, स्वास्थ्य बिमा पहुँच, न्यायिक सूचना प्रवाह तथा शिक्षा र धार्मिक अभ्यासको सुविधा प्रभावकारी बनाउन तत्काल पहल आवश्यक रहेको निष्कर्ष निकालेको छ।
Discussion about this post