बाँके वैशाख ६ गते ।
बाँके जिल्लामा महिला, बालबालिका र जेष्ठ नागरिकविरुद्ध हुने हिंसाका घटनामा वृद्धि भएको देखिएको छ। जिल्ला प्रहरी कार्यालय बाँकेले सार्वजनिक गरेको गत चैत महिनाको मासिक तथ्याङ्कअनुसार यस्ता १०३ वटा उजुरी दर्ता भएका छन्।
जिल्ला प्रहरी कार्यालय बाँकेका निमित्त सूचना अधिकारी प्रहरी निरीक्षक रमेश विष्टका अनुसार दर्ता भएका १०३ उजुरीमध्ये ८२ वटा विभिन्न तरिकाबाट फर्छ्यौट गरिएको छ भने २१ वटा उजुरी अझै बाँकी रहेका छन्।
उजुरी दिने पीडितहरूको उमेर समूह हेर्दा १८ देखि २५ वर्षका २५ जना तथा २६ देखि ३९ वर्षका ५२ जना महिला, बालबालिका र जेष्ठ नागरिक रहेका छन्।
यसैबीच, सोही महिनामा ५३ जना हराएको वा बेपत्ता भएको भन्दै प्रहरीमा निवेदन परेको थियो।
खोजतलासका क्रममा २९ जना फेला परेका छन् भने बाँकी २४ जनाको खोजी कार्य जारी रहेको प्रहरीले जनाएको छ। हराउनेमध्ये २५ जना महिला, १९ जना बालिका, ४ जना बालक र ५ जना जेष्ठ नागरिक रहेका थिए। तीमध्ये ११ जना महिला, १३ जना बालिका, ३ जना बालक र २ जना जेष्ठ नागरिक फेला परेका छन्।
हालसम्म १४ जना महिला, ६ जना बालिका, १ जना बालक र ३ जना जेष्ठ नागरिकको खोजी कार्य भइरहेको छ।
त्यस्तै, चैत महिनामा घरेलु हिंसा तथा झैंझगडाका ६८ वटा उजुरी दर्ता भएका थिए। तीमध्ये ५२ वटा उजुरीमा दुबै पक्षबीच मिलापत्र गराइएको छ भने बाँकी घटनाको अनुसन्धान भइरहेको प्रहरीले जनाएको छ।
यस अवधिमा जिल्लामा जघन्य, गम्भीर तथा सामान्य प्रकृतिका २०१ वटा मुद्दा दर्ता भएका छन्। तीमध्ये १७१ जनालाई पक्राउ गरी अनुसन्धान प्रक्रिया अघि बढाइएको जिल्ला प्रहरी कार्यालय बाँकेले जनाएको छ।
Discussion about this post