बाँके वैशाख ६ गते ।
संघीय सरकारले वैशाख १५ गतेपछि मात्र भर्ना प्रक्रिया सुरु गर्न निर्देशन जारी गरे पनि नेपालगन्ज उपमहानगरपालिकाले शैक्षिक सत्र २०८३ का लागि वैशाख ७ गतेदेखि विद्यार्थी भर्ना र वैशाख १५ गतेदेखि नियमित पठनपाठन सञ्चालन गर्ने निर्णय गरेको छ।
नगर प्रमुख प्रशान्त विष्टको उपस्थितिमा बसेको सरोकारवालाहरूको बैठकले उक्त निर्णय गरेको हो। नेपालगन्ज उपमहानगरपालिकाको शिक्षा, युवा तथा खेलकुद महाशाखाका अनुसार विभिन्न विद्यालयका प्रधानाध्यापक, शिक्षक महासंघ, प्याब्सन नेपालगन्ज र एन–प्याब्सन नेपालगन्जलगायतसँगको छलफलपछि सहमति जुटाइएको हो।
महाशाखा प्रमुख गोर्खबहादुर थापाले बैठकपछि जारी गरिएको पत्रअनुसार तत्कालका लागि उपमहानगरपालिकाको शैक्षिक क्यालेन्डरअनुसार नै विद्यालय सञ्चालन गरिने जानकारी दिए। साथै, संघीय सरकारले स्थानीय तहको सहभागितामा नयाँ कार्यतालिका सार्वजनिक गरेमा सोहीअनुसार कार्यान्वयन गरिने उल्लेख गरिएको छ।
निर्णयअनुसार संस्थागत विद्यालयहरूले नेपाल सरकारको पाठ्यक्रमअनुसार तयार गरिएका पाठ्यपुस्तक कम्तीमा तीन वर्षसम्म निरन्तर रूपमा लागू गर्नुपर्नेछ। यस्तै, सामुदायिक तथा धार्मिक विद्यालयहरूले भर्नासँगै सरकारी पाठ्यक्रमअनुसारका पाठ्यपुस्तक विद्यार्थीलाई वितरण गर्नुपर्ने व्यवस्था गरिएको छ।
त्यसैगरी, संस्थागत विद्यालयहरूले उपमहानगरपालिकाले तोकेको मापदण्डभित्र रहेर मात्र विद्यार्थी शुल्क लिनुपर्ने निर्णयसमेत गरिएको महाशाखा प्रमुख थापाले बताए।
Discussion about this post