बाँके वैशाख ४ गते।
बाँके जिल्लामा विगतका विपद् घटनाहरूको विश्लेषणका आधारमा सम्भावित जोखिमको आँकलन गर्दै जिल्ला विपद् पूर्वतयारी तथा प्रतिकार्य योजना तयार गरिएको छ।
उक्त योजना अनुसार यस वर्ष बाढीका कारण मात्रै जिल्लामा ६५ हजारभन्दा बढी जनसङ्ख्या प्रभावित हुने अनुमान गरिएको जिल्ला विपद् व्यवस्थापन समितिले जनाएको छ।
जिल्ला आपतकालीन सञ्चालन केन्द्रका सूचना व्यवस्थापन अधिकृत रुपन ज्ञवालीका अनुसार जिल्लाका आठ स्थानीय तहका ५२ वडामा रहेका १३ हजार २५७ घरधुरी बाढीबाट प्रभावित हुने पूर्वानुमान गरिएको छ।
उनका अनुसार प्रतिकार्य योजनामा ती घरधुरीका ६५ हजार ४४२ जना बाढीको उच्च जोखिममा रहेको उल्लेख गरिएको छ।
योजनाअनुसार राप्तीसोनारी गाउँपालिका र डुडुवा गाउँपालिका सबैभन्दा बढी जोखिममा रहेका छन्। राप्तीसोनारीका नौ वडाका ३ हजार २७९ घरधुरीका १७ हजार ६९५ जना तथा डुडुवाका छ वडाका ३ हजार ८८२ घरधुरीका १९ हजार ८५२ जना प्रभावित हुने अनुमान गरिएको छ।
त्यसैगरी नेपालगन्ज उपमहानगरपालिका, कोहलपुर नगरपालिका, नरैनापुर, बैजनाथ, खजुरा र जानकी गाउँपालिकाका विभिन्न वडाहरू पनि बाढीको जोखिममा रहेका छन्। नेपालगन्जका ५१०, कोहलपुरका २ हजार ३४, नरैनापुरका ३९१, बैजनाथका १ हजार ५४०, खजुराका १ हजार ४९५ र जानकीका ३२६ घरधुरी प्रभावित हुने अनुमान गरिएको छ।
पश्चिम राप्ती नदीमा आउने बाढी, गर्मीयाममा हुने आगलागी तथा जाडोयाममा लामो समयसम्म रहने शीतलहरका कारण जिल्लाका धेरै परिवार तथा समुदाय विपद्को उच्च जोखिममा रहेका छन्।
तुलनात्मक रूपमा हरेक वर्ष दोहोरिने र ठूलो जनसङ्ख्यालाई प्रभावित गर्ने भएकाले बाँकेमा बाढीलाई मुख्य प्रकोपका रूपमा लिइएको जिल्ला विपद् व्यवस्थापन समितिले जनाएको छ।
Discussion about this post