बाँके, जेठ ९ गते।
बाँके जिल्लाको सीमा सुरक्षालाई थप प्रभावकारी बनाउने अभियानअन्तर्गत सशस्त्र प्रहरी बल नेपाल नं. ३० गण हेडक्वार्टर, बागेश्वरी बाँकेको सक्रिय परिचालनमा ठूलो परिमाणमा लागूऔषध बरामद गरिएको छ।
सशस्त्र प्रहरी बल नेपाल नं. ३० गणका गणपति भीमबहादुर चन्दको निर्देशनमा सीमा क्षेत्रमा चोरी–तस्करी, लागूऔषध ओसारपसार तथा अन्य अवैध गतिविधि नियन्त्रणका लागि विशेष सुरक्षा अभियान सञ्चालन हुँदै आएको छ। सोही अभियानअन्तर्गत मातहतको बीओपी कालाबन्जरबाट खटिएको सशस्त्र प्रहरी टोलीले नेपालगञ्ज उपमहानगरपालिका–१५ पिप्रहवा सीमा क्षेत्रमा नियमित गस्तीका क्रममा ठूलो मात्रामा अवैध लागूऔषध बरामद गरेको हो।
प्रहरीका अनुसार नेपालबाट अवैध रूपमा भारततर्फ लैजान लागिएको करिब ५ किलो ५ सय ग्राम अफिमजस्तो देखिने कालो पदार्थ र ५ ग्राम चरेसजस्तो देखिने पदार्थ बरामद गरिएको छ। साथै, लागूऔषध ओसारपसारमा संलग्न रहेको आरोपमा जिल्ला जुम्ला, साविक घोडेमहादेव गाविस–९ हाल तिला गाउँपालिका–७ निवासी तथा हाल कोहलपुर नगरपालिका–१० बस्दै आएका ६२ वर्षीय रणबहादुर रोकायालाई पक्राउ गरिएको छ।
उनको साथबाट एक थान मोबाइलसमेत बरामद गरिएको सशस्त्र प्रहरीले जनाएको छ। पक्राउ परेका रोकायालाई आवश्यक अनुसन्धान तथा कानुनी कारबाहीका लागि सम्बन्धित निकायमा बुझाइएको छ।
सशस्त्र प्रहरी बल नेपाल नं. ३० गणले पछिल्लो समय सीमा क्षेत्रमा निगरानी थप कडा बनाउँदै चोरी–तस्करी नियन्त्रण, लागूऔषध बरामद तथा सीमा अपराध न्यूनीकरणमा उल्लेखनीय सफलता हासिल गर्दै आएको जनाएको छ।
सशस्त्र प्रहरी बल नेपालले सीमा क्षेत्रमा हुने सबै प्रकारका अवैध गतिविधि नियन्त्रण गर्दै शान्ति, सुरक्षा र कानूनी शासन कायम गर्न यस्ता अभियानलाई अझ प्रभावकारी रूपमा निरन्तरता दिइने जनाएको छ।
Discussion about this post