रुपन्देही, जेठ ९ गते ।
जिल्ला प्रहरी कार्यालय रुपन्देहीले नक्कली नेपाली नोट छाप्ने कार्यमा संलग्न दुई जनालाई कम्प्युटर, प्रिन्टर तथा अन्य सामग्रीसहित पक्राउ गरेको छ ।
प्रहरीका अनुसार जिल्लाको लुम्बिनी सांस्कृतिक नगरपालिका क्षेत्रबाट नक्कली नोट छाप्न प्रयोग गरिएका कम्प्युटर, प्रिन्टर, कैची तथा केही नक्कली नोटसहित उनीहरूलाई नियन्त्रणमा लिइएको हो ।
पक्राउ पर्नेमा भारत उत्तर प्रदेशको सिद्धार्थनगर नौगढ ककरहवा निवासी अब्दुल गफ्फरका छोरा ३८ वर्षीय अब्दुल हमिद तथा रुपन्देहीको लुम्बिनी सांस्कृतिक नगरपालिका–११ मसिना निवासी २२ वर्षीय बिक्की भन्ने अनिल पासी रहेका छन् ।
जिल्ला प्रहरी कार्यालय रुपन्देहीका अनुसार गोप्य सूचनाका आधारमा प्रारम्भिक अनुसन्धान अघि बढाउँदै संलग्न व्यक्तिहरूको पहिचान तथा खोजतलास गर्ने क्रममा इलाका प्रहरी कार्यालय लुम्बिनीबाट खटिएको प्रहरी टोलीले नोट छाप्ने स्थानमा छापा मारेर उनीहरूलाई पक्राउ गरेको हो ।
प्रहरीले पक्राउ परेकाहरूबाट एउटै नम्बर ‘ङ २५ ०२४९१२’ अंकित नेपाली पाँच सय दरका ३० थान नक्कली नोट बरामद गरेको जनाएको छ । साथै नेपाली एक सय, पाँच सय र एक हजार दरका प्रिन्ट भई कटिङ नगरेको अवस्थामा रहेका सात थान नक्कली नोट, नक्कली नोट छाप्न प्रयोग गरिएको एक थान सिपियु, एक थान प्रिन्टर, एक थान मोनिटर, दुई थान मोबाइल, एक थान कैची तथा अन्य कागजात समेत बरामद गरिएको प्रहरीले जनाएको छ ।
Discussion about this post