बाँके जेठ १० गते ।
अत्यधिक गर्मी र तातो हावा ‘लु’ बाट राहत पाउन बाँकेसहित सीमावर्ती भारतीय सहरका सर्वसाधारणको प्रमुख रोजाइ अहिले नेपालगन्जका वाटरपार्क र स्विमिङ पुल बन्न थालेका छन्।
गर्मीको प्रभाव बढेसँगै नेपालगन्ज, कोहलपुर तथा आसपासका क्षेत्रका साथै भारतका बहराइच, नानपारा, बाबागञ्ज, मिहीपुरवा, कैसरगञ्जलगायत सहरबाट ठूलो सङ्ख्यामा मानिस नेपालगन्जका वाटरपार्क र पौडीपोखरीमा पुग्न थालेका हुन्।
नेपालगन्ज उपमहानगर क्षेत्र र आसपासमा सञ्चालनमा रहेका वाटरपार्क तथा होटलका स्विमिङ पुलहरू यतिबेला दैनिक रूपमा भरिभराउ देखिन थालेका छन्। विशेषगरी बिदाका दिन र सप्ताहन्तमा यहाँ आउनेको सङ्ख्या उल्लेख्य हुने गरेको व्यवसायीहरू बताउँछन्।
जानकी गाउँपालिका–६, मनिकापुरस्थित अत्याधुनिक “वन्डरल्याण्ड वाटर एण्ड फन पार्क” मा पछिल्लो समय सबैभन्दा बढी भीड हुने गरेको सञ्चालक शिवन्सु यादवले जानकारी दिए। उनका अनुसार अत्यधिक गर्मी बढेसँगै अहिले दैनिक ५०० देखि एक हजारसम्म आन्तरिक तथा भारतीय पर्यटक पार्कमा आउने गरेका छन्।
“पहिले बिदाको दिनमा मात्र बढी भीड हुन्थ्यो, अहिले त हरेक दिन पानीमा रमाउन आउनेको चाप बढेको छ,” यादवले भने।
गर्मीबाट राहत खोज्दै वाटरपार्क पुगेकाहरूले पनि अनुभव उत्साहजनक रहेको बताएका छन्। भारतको बहराइचबाट आएका दिनेश मिश्रले अत्यधिक गर्मीका बीच पानीमा खेल्दा शरीर र मन दुवैलाई राहत मिलेको बताए। उनले साथीहरूसँग समय बिताउँदा गर्मीको अनुभूति नै कम भएको प्रतिक्रिया दिए।
नेपालगन्जका रमेश साहुले पनि बढ्दो तापक्रमका बीच आफ्नै क्षेत्रमा सुविधा सम्पन्न वाटरपार्क उपलब्ध हुनु सकारात्मक पक्ष भएको बताए। “केही समय पौडी खेल्दा र पानीमा रमाउँदा गर्मी बिर्सिएजस्तो हुन्छ,” उनले भने।
यस्तै, नेपालगन्जको बालेगाउँस्थित “मेरो प्लानेट वाटरपार्क” र कोहलपुरको “ह्याप्पी वल्र्ड वाटरपार्क” मा पनि दैनिक ठूलो भीड हुने गरेको छ। चरम गर्मीबाट राहत पाउन टाढाटाढाबाट मानिसहरू ती स्थानमा पुग्ने गरेका छन्।
वाटरपार्कबाहेक नेपालगन्ज रंगशालास्थित स्विमिङ पुल, खजुरा मिनी पार्कको पौडीपोखरी तथा विभिन्न होटलमा सञ्चालित स्विमिङ पुलहरूमा पनि गर्मी छल्न आउनेको चहलपहल उल्लेख्य रूपमा बढेको छ।
भारतीय सीमासँग जोडिएको तथा पश्चिम नेपालको प्रमुख व्यापारिक र सेवा केन्द्रका रूपमा विकसित नेपालगन्जमा सञ्चालित वाटरपार्कहरूले गर्मीयाममा नेपाली र भारतीय पर्यटकलाई समान रूपमा आकर्षित गरिरहेका छन्।
Discussion about this post