बाँके, जेठ ११ गते ।
छिमेकी मुलुक भारतमा अत्यधिक गर्मी र हिटस्ट्रोकका कारण मृत्युका घटनाहरू सार्वजनिक भइरहेका बेला नेपालको पश्चिमी तराई क्षेत्र पनि चर्को गर्मी र लुको प्रभावबाट प्रभावित बनेको छ ।
केही दिनयता भेरी अस्पतालमा गर्मीका कारण स्वास्थ्य समस्या लिएर आउने बिरामीको संख्या उल्लेख्य रूपमा बढेको छ । अस्पतालका अनुसार दैनिक करिब एक सय जना बिरामी गर्मीजन्य समस्याका कारण उपचारका लागि आउने गरेका छन् ।
लुबाट प्रभावित अधिकांश बिरामीहरूमा टाउको दुख्ने, वाकवाकी लाग्ने, बान्ता हुने, शरीरमा पानीको मात्रा कमी हुने, ज्वरो आउने तथा श्वासप्रश्वाससम्बन्धी समस्या देखिने गरेको चिकित्सकहरूले बताएका छन् ।
अस्पतालका मेडिकल सुपरिन्टेन्डेन्ट डा. नवीन दर्नालका अनुसार अस्पतालका सबै २०० बेड भरिएका छन् । “लुबाट प्रभावित बिरामीहरूको संख्या पनि उल्लेख्य छ । इमर्जेन्सी वार्डमा बिरामीको चाप अत्यधिक बढेको छ,” उनले भने, “तापक्रम अझै बढ्दै गएमा हिटस्ट्रोकका बिरामी थप बढ्न सक्ने अनुमान गरेका छौं ।”
दिउँसोको तापक्रम ४० डिग्री सेल्सियसभन्दा माथि पुगेपछि पश्चिम तराईका नेपालगञ्ज, धनगढी, दिपायल लगायतका क्षेत्रका सर्वसाधारण गर्मीबाट प्रत्यक्ष प्रभावित भएका छन् । लुम्बिनी प्रदेश र सुदूरपश्चिम प्रदेशअन्तर्गतका अन्य तराई जिल्लाहरूमा पनि तापक्रम करिब ४० डिग्री सेल्सियस आसपास पुगेको छ, जसले लुको अवस्था सिर्जना गरेको छ ।
चिकित्सकहरूका अनुसार दिउँसोको समयमा खेतबारी तथा निर्माण क्षेत्रमा काम गर्ने किसान, मजदुर र दैनिक ज्यालादारीमा संलग्न श्रमिकहरू सबैभन्दा बढी जोखिममा रहेका छन् । लुका बिरामीसँगै ज्वरो, झाडापखाला तथा सर्पदंशका बिरामीहरूको संख्या पनि बढ्दै गएको अस्पतालले जनाएको छ ।
यसैबीच, दक्षिणी भारतमा यस वर्षको गर्मी याममा मात्रै कम्तीमा १६ जनाको हिटस्ट्रोकका कारण मृत्यु भएको विभिन्न सञ्चारमाध्यमहरूले जनाएका छन् । भारतका धेरैजसो स्थानमा तापक्रम ४५ डिग्री सेल्सियसभन्दा माथि पुगेको बताइएको छ ।
मौसम पूर्वानुमान महाशाखाले तराई जिल्लाहरूमा लुको जोखिम बढेको भन्दै आवश्यक सतर्कता अपनाउन आग्रह गरेको छ । महाशाखाले तराई क्षेत्रमा लुको चेतावनी तथा पहाडी भूभागमा ‘तातो दिन’ को चेतावनीसमेत जारी गरेको जनाएको छ ।
Discussion about this post