बाँके, जेठ २१ गते ।
नेपालगन्ज नाकाबाट चालु आर्थिक वर्ष २०८२/८३ को पहिलो १० महिनामा करिब १७ अर्ब रुपैयाँ राजस्व सङ्कलन भएको छ। नेपालगन्ज भन्सार कार्यालयका प्रमुख जनार्दन पौडेलका अनुसार उक्त अवधिमा कार्यालयले १६ अर्ब ७३ करोड ९७ लाख ५९ हजार रुपैयाँ राजस्व सङ्कलन गरेको हो।
भन्सार कार्यालयले सो अवधिमा २० अर्ब १० करोड ७८ लाख ५५ हजार रुपैयाँ राजस्व सङ्कलन गर्ने लक्ष्य राखेको थियो। तर लक्ष्यको तुलनामा करिब ३ अर्ब ३७ करोड रुपैयाँ कम राजस्व सङ्कलन भएको प्रमुख पौडेलले जानकारी दिए।
गत आर्थिक वर्ष २०८१/८२ को सोही अवधिमा १६ अर्ब ४६ करोड २४ लाख रुपैयाँ राजस्व सङ्कलन भएको थियो। चालु आर्थिक वर्षमा भने अघिल्लो वर्षको तुलनामा करिब २७ करोड ७३ लाख रुपैयाँ बढी राजस्व सङ्कलन भएको भन्सार कार्यालयले जनाएको छ।
कार्यालयका अनुसार चालु आवको १० महिनामा नेपालगन्ज नाकाबाट ७० अर्ब २३ करोड ९ लाख २४ हजार रुपैयाँ बराबरको वस्तु आयात तथा २ अर्ब ८२ करोड ६९ लाख ६७ हजार रुपैयाँ बराबरको वस्तु निर्यात भएको छ। गत वर्षको तुलनामा आयात र निर्यात दुवैमा वृद्धि भएको तथ्याङ्कले देखाएको छ।
नेपाल–भारत सीमास्थित जमुनाह नाकामा एकीकृत जाँच चौकी (आईसीपी) सञ्चालनमा आएपछि आयात–निर्यात विस्तार भई भन्सार राजस्वमा उल्लेख्य वृद्धि हुने अपेक्षा गरिएको थियो। तर अपेक्षाअनुरूप राजस्व सङ्कलन हुन नसकेको व्यवसायीहरूको भनाइ छ।
नेपालगन्ज उद्योग वाणिज्य सङ्घका अध्यक्ष टङ्क धामीले पछिल्ला केही वर्षदेखि नेपालगन्ज नाकाबाट लक्ष्यअनुसार भन्सार राजस्व सङ्कलन हुन नसकेको उल्लेख गर्दै यसको कारणबारे गम्भीर अध्ययन आवश्यक रहेको बताए। उनका अनुसार नाकामा तस्करी नियन्त्रणका लागि सुरक्षा निकायले निरन्तर सक्रियता देखाए पनि लक्ष्यअनुसार राजस्व सङ्कलन हुन नसक्नु चिन्ताको विषय बनेको छ।
व्यापार तथा राजस्व सङ्कलनको अवस्था सुधार गर्न सीमा व्यवस्थापन, व्यापार सहजीकरण र तस्करी नियन्त्रणका उपायहरूको प्रभावकारिताबारे थप मूल्याङ्कन आवश्यक देखिएको सरोकारवालाहरूको भनाइ छ।
Discussion about this post