बाँके, जेठ २१ गते ।
दैनिक तापक्रम बढ्दै जाँदा बाँकेसहित पश्चिम तराई क्षेत्रको जनजीवन प्रभावित हुन थालेको छ। केही दिनअघि भएको वर्षाले क्षणिक राहत दिएको भए पनि पुनः गर्मी बढ्न थालेको छ। हावापानी फिल्ड कार्यालय राँझाका अनुसार बुधबार नेपालगञ्जको अधिकतम तापक्रम ३९.५ डिग्री सेल्सियस पुगेको छ भने न्यूनतम तापक्रम २५ डिग्री सेल्सियस मापन गरिएको छ।
तापक्रम निरन्तर बढ्दै जाँदा जनस्वास्थ्यमा प्रतिकूल असर पर्न सक्ने तथा ‘लु’ (हीट स्ट्रोक) को जोखिम बढ्ने विज्ञहरूले बताएका छन्। यसअघि वर्षा नहुँदा नेपालगञ्जको तापक्रम ४१ डिग्री सेल्सियसभन्दा माथि पुगेको थियो।
चिकित्सकहरूका अनुसार ‘लु’ लाग्दा अत्यधिक थकान, कमजोरी, अत्यधिक तिर्खा लाग्ने, वान्ता हुने, चक्कर लाग्ने तथा बेहोस हुनेजस्ता समस्या देखिन सक्छन्। त्यसैले गर्मीका बेला विशेष सावधानी अपनाउन उनीहरूले आग्रह गरेका छन्।
भेरी अस्पताल नेपालगञ्जका सूचना अधिकारी तथा वरिष्ठ फिजिसियन डा. संकेत रिसालले ‘लु’ बाट बच्न सकेसम्म घरभित्र वा चिसो स्थानमा बस्न, अनावश्यक रूपमा घाममा हिँडडुल नगर्न तथा हलुका र शरीर ढाक्ने कपडा लगाउन सुझाव दिएका छन्। घरबाहिर निस्कँदा टाउको कपडा, टोपी वा अन्य सामग्रीले राम्रोसँग छोप्न र पर्याप्त मात्रामा पानी तथा झोल पदार्थ सेवन गर्नुपर्ने उनको भनाइ छ।
अत्यावश्यक कामका लागि बाहिर निस्किनुपरे कटनका कपडाले शरीर पूरै ढाक्ने र टाउको सुरक्षित राख्ने व्यवस्था गरेर मात्र निस्किन उनले आग्रह गरेका छन्।
बाँकेमा बढ्दो गर्मीका कारण दैनिक ज्यालादारी गरेर जीविकोपार्जन गर्ने मजदुरहरू सबैभन्दा बढी प्रभावित भएका छन्। चर्को घामका कारण सहरी क्षेत्रमा समेत मानिसहरूको चहलपहल कम देखिएको छ। स्थानीयवासीहरूले दिउँसोको समयमा घरबाहिर निस्केर काम गर्न निकै कठिन भइरहेको बताएका छन्।
गर्मी मौसममा शरीरमा पानीको कमी हुँदा एलर्जी, डिहाइड्रेसन तथा अन्य स्वास्थ्य समस्या बढ्न सक्ने डा. रिसालले बताएका छन्। उनका अनुसार शरीरमा पर्याप्त पानी नहुँदा विषाक्त पदार्थहरू सहज रूपमा बाहिर निस्कन सक्दैनन्, जसले विभिन्न स्वास्थ्य समस्या निम्त्याउन सक्छ।
डा. रिसालले तिर्खा नलागे पनि नियमित रूपमा प्रशस्त पानी पिउन सुझाव दिएका छन्। शरीरमा पानीको कमीले डिहाइड्रेसन हुन सक्ने उल्लेख गर्दै उनले पानीको सट्टा बियर, कफी, सोडा लगायतका पेय पदार्थको अत्यधिक सेवनले झन् स्वास्थ्यमा नकारात्मक असर पार्न सक्ने चेतावनी दिएका छन्।
Discussion about this post