बाँके, असार ५ गते ।
यातायात व्यवस्था कार्यालय नेपालगञ्ज परिसरबाट चालक अनुमतिपत्र (लाइसेन्स) सम्बन्धी स्वास्थ्य प्रमाणपत्र वितरण प्रक्रियामा अनियमितता गरेको आरोपमा दुई चिकित्सकसहित पाँच जनालाई प्रहरीले पक्राउ गरेको छ।
जिल्ला प्रहरी कार्यालय बाँकेका प्रहरी नायब उपरीक्षक प्रतितसिंह राठौरका अनुसार सवारी चालक अनुमतिपत्र प्राप्त गर्न तथा नवीकरण गर्न आवश्यक पर्ने स्वास्थ्य परीक्षण आधिकारिक चिकित्सकमार्फत गरी चिकित्सकीय प्रतिवेदन उपलब्ध गराउनुपर्ने व्यवस्था छ। तर, स्वास्थ्य परीक्षण नगरी प्रतिव्यक्ति रु २०० लिएर निरोगिताको प्रमाणपत्र वितरण गरिएको सूचनाका आधारमा प्रहरीले निगरानी तथा अनुसन्धान अघि बढाएको थियो।
प्रहरीले प्राप्त सूचनाको सत्यता परीक्षण गर्न विशेष टोली परिचालन गरी अनुगमन तथा अवलोकन गर्दा नियमविपरीत कार्य भएको प्रारम्भिक रूपमा पुष्टि भएपछि दुई चिकित्सकसहित पाँच जनालाई नियन्त्रणमा लिइएको जनाएको छ।
प्रहरी नायब उपरीक्षक राठौरले घटनाबारे थप अनुसन्धान जारी रहेकाले पक्राउ परेका चिकित्सक तथा अन्य व्यक्तिहरूको नाम हाल सार्वजनिक नगरिएको जानकारी दिए। उनले स्वास्थ्य परीक्षणसम्बन्धी प्रचलित नियम तथा प्रक्रियाको उल्लङ्घन भएको देखिएकाले कानुनी कारबाहीको प्रक्रिया अघि बढाइएको बताए।
घटनाबारे थप अनुसन्धान भइरहेको प्रहरीले जनाएको छ।
Discussion about this post