बाँके, असार ६ गते ।
महिलालाई आत्मनिर्भर बनाउने उद्देश्यसहित सञ्चालन गरिएको एक महिने सिलाई कटाई तालिम नेपालगन्जमा सम्पन्न भएको छ ।
पर्यटन डिभिजन कार्यालय कोहलपुरको सहयोगमा त्रिनेत्र समृद्ध नेपालले आयोजना गरेको तालिम शनिवार एक कार्यक्रमका विच समापन गरिएको हो ।
तालिम समापन कार्यक्रममा बोल्दै लुम्विनी प्रदेश सभा सदस्य अम्विका काफ्ले आफ्नो संसदिय कोषबाट तालिम आयोजना गरिएको बताइन् । उनले गरिवीको रेखामुनी रहेका महिलाको जिवनस्तर उकास्न तालिम आयोजना गरिएको जानकारी दिइन् ।
उनले आगामी दिनमा पनि गरिवीको रेखामुनी रहेका महिलाको उत्थानका लागि रकम विनियोजन गर्ने आश्वासन दिइन् । ‘तालिमले गरिवीको रेखामुनी रहेका ममहिलाको आर्थिक तथा पारिवारिक समृद्धिमा टेवा पुग्ने अपेक्षा लिएको छु,’ उनले भनिन्, ‘तालिम लिएका महिलाको ब्यवसायिक जिवनमा समेत सहयोग पुग्ने छ ।’
नेपालगन्जका महिलाको सहभागिता रहेको तालिमका सहभागी यशोदा शर्माले तालिमबाट धेरै राम्रो सीप सिकेको बताइन् । उनले भनिन्, ‘सियो समेत नसमाएका हामीले सिलाई कटाई सम्बन्धि धेरै सीप सिक्यौँ । तालिमले हाम्रो जिवनस्तर उकास्न र आर्थिक समृद्धिमा टेवा पुग्ने आशा लिएका छौ ।’
उनले महिलाको जिवनस्तर उकास्न समय समयका यस्ता सीपमुलक तालिम आयोजना गरिनुपर्ने बताइन् । ‘एक महिनासम्म धेरै राम्रो सीप सिक्ने अवसर पायौँ, आगामी दिनमा एड्भान्स लेवलको तालिम मपनि दिनुहुने छ भन्ने आशा गरेका छौँ,’ उनले भनिन् ।
नेपालगन्ज उपमहानगरपालिका–१३ बुलबुलियाकी माया केवटले एक महिने तालिममा कुर्ता, सलवार, भोटो, पेटीकोट सिलाउन सिकेको बताइन् । उनले सियोसमेत नसमातेको बताउँदै सीप सिक्ने अवसर दिएकोमा आयोजक र लुम्विनी प्रदेश सभा सदस्य अम्विका काफ्लेलाई धन्यवाद दिइन् । ‘एक महिने सिलाई कटाई तालिमले आत्मनिर्भर बन्ने बाटो खुलेको छ,’ उनले भनिन्, ‘सिकेको सीपले आर्थिक तथा पारिवारिक समृद्धिमा टेवा पुग्ने आशा राखेका छौँ ।’
तालिम समापनका विशिष्ट अतिथी पर्यटन डिभिजन कार्यालय कोहलपुरका प्रमुख मुक्तिप्रसाद पाण्डेले गरिवीको रेखामुनी रहेका महिलाको तालिमले आर्थिक समृद्धिमा टेवा पुग्ने बताए । उनले भने, ‘महिलाहरु आत्मनिर्भर भएमात्र परिवारको आर्थिक समृद्धि सम्भव छ ।’
सभापतिको आशनबाट बोल्दै त्रिनेत्र समृद्ध नेपालकी अध्यक्ष सुशिला पौडेलले महिलालाई आत्मनिर्भर बनाई उनीहरुको आर्थिक समृद्धिमा टेवा पुर्याउन तालिम आयोजना गरिएको बताइन् ।
समापन कार्यक्रममा सहभागीलाई जसपा नेपाल महिला संगठन बाँकेका सदस्य पार्वती आचार्य, पर्यटन डिभिजन कार्यालयका प्रमुख मुक्तिप्रसाद पाण्डे, लुम्विनी प्रदेश सभा सदस्य अम्विका काफ्ले लगायतले प्रमाणपत्र वितरण गरेका थिए ।
सो अवसरमा त्रिनेत्र समृद्ध नेपालकी उपाध्यक्ष सरस्वती गौतम, कोषाध्यक्ष रामप्रसाद डंगौरा, सदस्य ऋतु सिंह, प्रशिक्षक सीमा थापा, सल्लाहकार रेखा गुप्ता, जेष्ठ नागरिक लिलावती पौडेल लगायतका सहभागिता रहेको थियो ।
Discussion about this post