बाँके, असार ८ गते।
सशस्त्र प्रहरी बल नेपाल नं. ३० गण हेडक्वार्टर बागेश्वरी, बाँके तथा मातहतका इकाइहरूले भारतबाट अवैध रूपमा नेपाल भित्र्याइँदै गरिएका रु. ४५ लाख २७ हजार ९ सय ९१ मूल्य बराबरका विभिन्न सामान बरामद गरेका छन्।
गण हेडक्वार्टरका अनुसार असार १ गतेदेखि ७ गतेसम्म सञ्चालन गरिएको निगरानी तथा चेकजाँच अभियानका क्रममा लत्ताकपडा, किराना सामग्री, पेय पदार्थ, मोटरसाइकल, बोइलर कुखुरा, फलफूल तथा तरकारीलगायतका सामान बरामद गरिएको हो। यस अवधिमा अवैध गतिविधिमा संलग्न तीन जनालाई समेत नियन्त्रणमा लिइएको जनाइएको छ। 
बरामद गरिएका सम्पूर्ण सामग्री आवश्यक कानुनी प्रक्रिया अगाडि बढाउन नेपालगञ्ज भन्सार कार्यालयमा बुझाइएको सशस्त्र प्रहरीले जनाएको छ।
एसपी चन्दको नेतृत्वमा तस्करी नियन्त्रण अभियान प्रभावकारी
सशस्त्र प्रहरी बल नेपाल नं. ३० गण हेडक्वार्टर बागेश्वरीको कमाण्ड एसपी भीमबहादुर चन्दले सम्हालेयता सीमा क्षेत्रमा अवैध ओसारपसार नियन्त्रण अभियान थप प्रभावकारी बनेको देखिएको छ। सीमावर्ती नाकामा सुरक्षा निगरानी कडा पारिनुका साथै अवैध रूपमा भित्रिने सामानमाथि निरन्तर अनुगमन भइरहेको छ।
स्रोतका अनुसार एसपी चन्दले सीमा क्षेत्रबाट हुने अवैध कारोबार कुनै पनि हालतमा नियन्त्रण गर्न मातहतका इकाइलाई स्पष्ट निर्देशन दिएका छन्। एक सशस्त्र प्रहरी अधिकृतका अनुसार अवैध रूपमा नेपाल भित्र्याइने सामानमाथि कडा निगरानी राख्न र आवश्यक परे तत्काल बरामद गरी कानुनी दायरामा ल्याउन निर्देशन दिइएको छ।
सशस्त्र प्रहरीका अधिकारीहरूका अनुसार सीमा क्षेत्रबाट अवैध सामान प्रवेश गरेको पाइए सम्बन्धित बीओपी (बोर्डर आउट पोस्ट) का इन्चार्ज तथा जिम्मेवार कर्मचारीमाथि समेत कारबाही हुन सक्ने चेतावनी दिइएको छ। यही कारण सीमा क्षेत्रमा खटिएका सुरक्षाकर्मी थप जिम्मेवार र सक्रिय बनेका छन्।
सीमावर्ती क्षेत्रमा सशस्त्र प्रहरीको सक्रियता बढेसँगै अवैध व्यापार तथा राजस्व चुहावट नियन्त्रणमा उल्लेखनीय सफलता मिल्न थालेको स्थानीय सरोकारवालाहरू बताउँछन्। एक सातामै ४५ लाख रुपैयाँभन्दा बढी मूल्यका सामान बरामद हुनु त्यसैको परिणामका रूपमा हेरिएको छ।
Discussion about this post