बाँके, साउन २ गते ।
उच्च अदालत तुलसीपुर, नेपालगन्ज इजलासले गत आर्थिक वर्ष २०८२/८३ मा एक हजार ३५४ वटा मुद्दा फछ्र्यौट गरेको छ। जेनजी आन्दोलनका क्रममा भएको आगजनीका कारण करिब चार महिनासम्म न्याय सम्पादन प्रभावित भए पनि अदालतले कुल कायम मुद्दामध्ये ६२.६० प्रतिशत मुद्दा टुंग्याएको हो।
शुक्रबार वार्षिक प्रगति विवरण सार्वजनिक गर्दै मुख्य न्यायाधीश बामदेव ज्ञवालीले अघिल्लो आर्थिक वर्षबाट जिम्मेवारी सरेका ६४२ र गत वर्ष नयाँ दर्ता भएका एक हजार ५२१ गरी कुल दुई हजार १६३ मुद्दा कायम भएकामा एक हजार ३५४ वटा फछ्र्यौट भएको जानकारी दिए। अदालतले उक्त अवधिमा एक हजार ७४३ मुद्दा फछ्र्यौट गर्ने लक्ष्य राखेको थियो।
उनका अनुसार आगजनीका कारण अधिकांश मुद्दाका मिसिल जलेका थिए भने भवन र इजलास कक्षमा पनि क्षति पुगेको थियो। त्यसले करिब चार महिनासम्म अदालतको नियमित काम प्रभावित भए पनि न्याय सम्पादनलाई निरन्तरता दिइएको उनले बताए।
हाल अदालतमा ८०९ मुद्दा विचाराधीन छन्। दुई वर्षभन्दा पुराना कुनै पनि मुद्दा बाँकी नरहेको र १८ महिना पुगेका १५ वटा मुद्दा मात्रै रहेको जानकारी दिँदै उनले तीसमेत चालु साउनभित्र टुंग्याउने लक्ष्य रहेको बताए।
आगजनीबाट क्षतिग्रस्त पाँच इजलास कक्षमध्ये तीन वटा मर्मतपछि सञ्चालनमा आएका छन्। बजेट अभावका कारण बाँकी दुई वटा इजलास कक्ष अझै सञ्चालनमा आउन सकेका छैनन्।
मुख्य न्यायाधीश ज्ञवालीले जलेका मिसिलका कारण केही मुद्दाको सुनुवाइमा कठिनाइ भए पनि न्याय सम्पादन नरोकिएको बताए। घटनाको वास्तविक विवरण मिसिलमा समावेश हुन नसके सम्बन्धित पक्षले न्याय पाउन कठिन हुने भएकाले त्यसतर्फ अदालत गम्भीर रहेको उनको भनाइ थियो। उनले न्याय प्रणालीप्रति नागरिकको विश्वास बढाउन अदालत प्रतिबद्ध रहे पनि अदालत र सेवाग्राहीबीच अझै दूरी रहेको स्वीकार गरे।
अदालतले सार्वजनिक गरेको जिल्लागत तथ्याङ्कअनुसार बाँकेमा कुल सात हजार ४८ मुद्दामध्ये दुई हजार ७३३ मुद्दा फछ्र्यौट भएका छन् भने चार हजार ३१४ मुद्दा विचाराधीन छन्। बर्दियामा कुल एक हजार ९९४ मुद्दामध्ये एक हजार ३१२ मुद्दा फछ्र्यौट हुँदा ६८२ मुद्दा बाँकी छन्।
अदालतका अनुसार आर्थिक वर्ष २०८१/८२ मा ७५.७४ प्रतिशत र २०८०/८१ मा ७१.४१ प्रतिशत मुद्दा फछ्र्यौट भएका थिए। हाल उच्च अदालत तुलसीपुर, नेपालगन्ज इजलासमा छ जना न्यायाधीश कार्यरत छन्।
Discussion about this post