बाँके, साउन ३ गते ।
बाँकेको खजुरास्थित सुशील कोइराला प्रखर क्यान्सर अस्पतालमा लामो समयदेखि जडान भएर पनि सञ्चालनमा आउन नसकेको लिक्विड अक्सिजन प्लान्ट शनिबारदेखि सञ्चालनमा आएको छ।
अस्पतालका कार्यकारी निर्देशक डा. निरज भट्टराईका अनुसार २० किलोलिटर क्षमताको प्लान्टमा १८ किलोलिटर लिक्विड अक्सिजन भरेर सेवा सुरु गरिएको हो।
उनले अस्पतालको आफ्नै अक्सिजन प्लान्ट सञ्चालनमा आएपछि बाहिरबाट दैनिक सिलिन्डरमार्फत अक्सिजन ढुवानी गर्नुपर्ने बाध्यता हटेको बताए। अब अस्पतालले आवश्यकताअनुसार अक्सिजन भण्डारण गर्न सक्ने भएकाले आपूर्तिमा हुने ढिलाइ र अभावको जोखिम पनि कम हुने उनको भनाइ छ।
उक्त प्लान्ट स्वास्थ्य मन्त्रालयको समन्वय र युएसएडको आर्थिक सहयोगमा जडान गरिएको थियो। जडान सम्पन्न भएको लामो समयपछि मात्र सञ्चालनमा ल्याइएको हो।
डा. भट्टराईका अनुसार अस्पतालले उपचार सेवामा सुधारका लागि केमोथेरापी वार्डमै छुट्टै फार्मेसी सञ्चालनमा ल्याएको छ। रेडियोलोजी र प्रयोगशाला (डायग्नोस्टिक) सेवासमेत एउटै भवनबाट उपलब्ध गराउन थालिएको उनले बताए।
उनले लायन्स क्लबको समन्वयमा बिरामीका कुरुवाका लागि छिट्टै कुरुवा घर सञ्चालनमा ल्याइने जानकारी पनि दिए।
जनस्तरको धार्मिक अभियानबाट निर्माण भएको अस्पताल २०७२ सालमा संघीय सरकारलाई हस्तान्तरण गरिएको थियो। सरकारले स्वामित्व लिए पनि हालसम्म स्थायी दरबन्दी स्वीकृत नभएकाले अस्पताल अस्थायी, करार र ज्यालादारी स्वास्थ्यकर्मीबाट सञ्चालन हुँदै आएको छ।
भरतपुरदेखि पश्चिम नेपालतर्फको एकमात्र विशेष क्यान्सर अस्पतालका रूपमा रहेको यस अस्पतालले लुम्बिनी, कर्णाली र सुदूरपश्चिम प्रदेशका सयौं बिरामीलाई उपचार सेवा दिँदै आएको छ। नेपालगञ्जबाट करिब १० किलोमिटर पश्चिमस्थित खजुरामा रहेको अस्पताल पश्चिम नेपालका क्यान्सर बिरामीका लागि प्रमुख उपचार केन्द्रका रूपमा स्थापित हुँदै गएको छ।
Discussion about this post