बाँके, साउन ४ गते ।
यातायात क्षेत्रसँग सम्बन्धित सूचना प्रणालीको डेटाबेस माइग्रेसन तथा प्रदेश सरकारले निर्धारण गरेका नयाँ करका दर कार्यान्वयनको तयारीका कारण यातायातसम्बन्धी सेवा करिब एक सातासम्म प्रभावित हुने भएको छ।
यातायात व्यवस्था विभागले आइतबार सार्वजनिक सूचना जारी गर्दै डेटाबेस माइग्रेसन, नयाँ करका दररेट प्रविष्टि (इन्ट्री) तथा प्रणालीमा मिलान गर्ने काम भइरहेकाले सेवा प्रवाहमा अस्थायी असर पर्ने जनाएको हो।
विभागका अनुसार उक्त प्राविधिक काम सम्पन्न गर्न करिब एक साताको समय लाग्नेछ। त्यसैले अत्यावश्यक कामबाहेक सवारी दर्ता, नामसारी, नवीकरण, चालक अनुमति पत्रलगायतका सेवा लिन साउन ८ गतेपछि मात्र सम्बन्धित यातायात कार्यालयमा सम्पर्क गर्न सेवाग्राहीलाई आग्रह गरिएको छ।
यातायात व्यवस्था कार्यालय, बाँकेले पनि विभागको सूचनाअनुसार सार्वजनिक सूचना जारी गर्दै सेवाग्राहीलाई अनावश्यक रूपमा कार्यालयमा उपस्थित नहुन अनुरोध गरेको छ।
कार्यालयका निमित्त प्रमुख टंकनाथ खनालद्वारा जारी सूचनामा प्रणाली स्तरोन्नतिको काम सम्पन्न भएपछि सेवा नियमित रूपमा सञ्चालन हुने उल्लेख गर्दै यस अवधिमा सेवाग्राहीमा पर्न सक्ने असुविधाप्रति क्षमायाचना गरिएको छ।
Discussion about this post