बाँके, साउन ५ गते ।
बाँकेको डुडुवा गाउँपालिका–१ कधइपुरवास्थित डुडुवा खोलामाथि निर्माण गरिएको पुलको दुवैतर्फ पहुँचमार्ग व्यवस्थित नबनाइँदा स्थानीयवासी जोखिमपूर्ण रूपमा आवतजावत गर्न बाध्य भएका छन्।
पुलको दुवै किनारामा सडकको सतह नमिलाइएको, प्रवेशमार्ग साँघुरो बनाइएको तथा कङ्क्रिटका अवरोधका कारण मोटरसाइकल, साइकललगायत साना सवारीसाधन सञ्चालन गर्न कठिनाइ भइरहेको स्थानीयको गुनासो छ। वर्षायाममा सडक चिप्लो हुँदा दुर्घटनाको जोखिम अझ बढ्ने उनीहरू बताउँछन्।
डुडुवा खडैँचाका स्थानीय रामफेरन बर्माले पुलमा चढ्ने र ओर्लने क्रममा सन्तुलन गुम्ने जोखिम रहने बताए। उनका अनुसार वर्षायाममा आवतजावत झनै जोखिमपूर्ण हुने गरेको छ।
स्थानीय रमेश मिश्रले पुल निर्माणपछि आवतजावत सहज हुने अपेक्षा गरे पनि पहुँचमार्गको कमजोरीले उल्टै त्रासका बीच यात्रा गर्नुपरेको बताए।
“पुल बनेपछि सहज हुन्छ भन्ने सोचेका थियौँ। तर पुलमा चढ्ने र ओर्लने क्रममा निकै सावधानी अपनाउनुपर्छ। विद्यार्थी, महिला र ज्येष्ठ नागरिकलाई झन् बढी समस्या छ,” उनले भने, “सम्बन्धित निकायले पहुँचमार्ग सुधार गरिदिए आवतजावत सुरक्षित र सहज हुन्थ्यो।”
स्थानीयका अनुसार पुलसँग जोडिएको सडकको सतह नमिल्दा सवारीसाधन सञ्चालनदेखि पैदल यात्रा गर्नसमेत समस्या भइरहेको छ। पटक–पटक सम्बन्धित निकायको ध्यानाकर्षण गराए पनि सुधारको काम अघि नबढेको उनीहरूको भनाइ छ।
डुडुवा गाउँपालिका–१ का वडाध्यक्ष पटेश्वर कुर्मीले पुल तीन वर्षअघि प्रदेश सरकारको बजेटबाट वडा कार्यालय र गाउँपालिकासँग आवश्यक समन्वय नगरी निर्माण गरिएको बताए।
उनका अनुसार पुल तटबन्धसहित सुरक्षित स्थानमा निर्माण हुनुपर्नेमा खोलाको कटान हुने क्षेत्रमा बनाइएकाले दुवैतर्फको पहुँचमार्ग बग्ने समस्या देखिएको हो। त्यसैले पुल प्रयोग गर्नसमेत जोखिम बढेको भन्दै उनले पहुँचमार्ग मर्मत र नदी नियन्त्रणका काम तत्काल अघि बढाउन सम्बन्धित निकायसँग माग गरे।
Discussion about this post