बाँके, साउन ४ गते ।
बाँकेमा तरकारी तथा फलफूलको विषादी परीक्षणको दायरा बढेसँगै कैफियत भेटिने नमुनाको सङ्ख्या पनि बढेको छ। आर्थिक वर्ष ०८२/८३ मा दुई हजार ६२ वटा नमुना परीक्षण गर्दा १२ वटामा मापदण्डभन्दा बढी विषादी अवशेष भेटिएको कृषि विभागअन्तर्गतको केन्द्रीय कृषि प्रयोगशाला, विषादी अवशेष द्रुत विश्लेषण प्रयोगशाला एकाइ नेपालगन्जले जनाएको छ।
अघिल्लो आर्थिक वर्ष ०८१/८२ मा एक हजार ८८३ वटा नमुना परीक्षण गर्दा १० वटामा र ०८०/८१ मा एक हजार ९४ वटा नमुना परीक्षण गर्दा सात वटामा कैफियत भेटिएको थियो। प्रयोगशालाका नायव प्राविधिक सहायक गौरव चौधरीले परीक्षणको दायरा विस्तार भएकाले कैफियत भेटिने सङ्ख्यामा पनि वृद्धि देखिएको बताए।
उनका अनुसार कैफियत भेटिएका सबै नमुना बाँकेमा उत्पादन भएका रायो, धनियाँ, पालुङ्गो साग र खुर्सानीका हुन्। १२ नमुनामध्ये ११ वटामा ‘रेड लेबल’ र एउटामा ‘यल्लो लेबल’ वर्गीकरण गरिएको छ। रेड लेबल पाएका तरकारी उपभोगका लागि अयोग्य मानिन्छन् भने यल्लो लेबल पाएका तरकारी केही दिन क्वारेन्टिनमा राखेर पुनः परीक्षण गरिन्छ।
प्रयोगशालामा नेपालका विभिन्न जिल्लाबाट नेपालगन्ज भित्रिने तथा भारतबाट आयात हुने तरकारी र फलफूलमा अर्गानोफस्फेट र कार्बामेट समूहका विषादीको अवशेष परीक्षण गरिन्छ। नमुना परीक्षणको नतिजा सामान्यतया एकदेखि डेढ घण्टाभित्र आउने प्रयोगशालाले जनाएको छ।
Discussion about this post